Os directores de obra din que o campo de fútbol executouse conforme ao proxecto, lamentando Manuel Cuíña que o PP «intente destruír o que facemos»
17 novs 2018 . Actualizado ás 05:00 h.O alcalde de Silleda regresou da súa viaxe a Cataluña para analizar modelos de mobilidade repleto de ideas pero tamén de respostas sobre proxectos e obras que xeraron críticas do PP nos últimos días. A controversia aberta desde hai máis tempo ten ao campo de fútbol da Gandareira e a súa reforma como protagonista. Os populares denunciaran irregularidades en accesibilidade e seguridade, ademais de cuestionar a urbanización exterior ao crer que o viario incumpre a normativa para dobre circulación. Pediran informes sobre estes temas, que Manuel Cuíña xa ten no seu poder e onte esgrimiu para cuestionar que «tristemente o PP actual tenta destruír o que facemos sen importarlles quen saia prexudicado».
Cuíña lembrou que se contou con dous directores de obra, un técnico do Concello e outro externo que redactou o proxecto do campo da Bandeira. A eles pediulles un informe sobre as supostas irregularidades expostas polo PP, resaltando ambos os que a execución da obra cumpre coa normativa en materia de seguridade e accesibilidade. «Non houbo alteracións significativas do proxecto, tan só estéticas», recolle o documento.
«Será avogado e tamén arquitecto -en alusión ao portavoz do PP, Ignacio Maril- pero eu son transportista e non teño que saber do que compete aos técnicos, e dous deles firman un escrito no que din que se cumpre a normativa no campo». E outro informe do que daba conta o rexedor, datado o día 12, foi o encargado á Policía Local sobre a circulación na contorna do complexo deportivo. E neste caso recóllese unha ampliación do ancho do viario respecto da situación previa á obra, con redución de velocidade a 30 quilómetros por hora, novos pasos de peóns, sinalización e senllas peonís a ambos os dous lados da calzada.
O informe da Policía Local alude a que o ancho da calzada única xunto a Gandarería varía entre 4,65 e 5,20 metros, sen marcar divisoria central e con 1,80 de senda peonil. Mentres o Ministerio de Fomento fixa que o ancho debe ser de entre 3 e 3,5 metros para a calzada, pero que se pode reducir en tramos periurbanos e urbanos levando a cabo unha redución de velocidade, que foi o que se fixo fronte ao campo de fútbol. «Se antes non houbo nunca problemas de circulación é pouco probable que ocorra agora», dixo o rexedor.
Cuíña aludiu a que a segunda fase da Gandareira, con máis de 700.000 euros achegados desde a Deputación a través do plan de reequilibrio, foi un dos vinte e cinco subvencionados, noutros casos con contías máis altas como 1,5 millóns para A Illa de Arousa ou O Grove. Pero a pesar diso e non ser unha excepción, lamentou que o PP só preguntase na Deputación polo proxecto da Bandeira. «Non se xustifica baixo ningún concepto e non é bo para futuras inversións, o que me parece gravísimo para os intereses do Concello», remachou o alcalde silledense.
As urbanizacións da contorna da residencia e Chousa Nova prevense iniciar co ano
Restar protagonismo aos coches en beneficios das persoas. Así se resume a pretensión municipal en Silleda, incorporando algunhas iniciativas vistas polo rexedor en cidades como Sitges, Granollers ou Barcelona, que en certa medida xa están reflectidas nas dúas novas urbanizacións cuxa adxudicación se agarda en breve, a contorna do centro residencial e de día e en Chousa Nova, con máis de 1 millón de euros de investimento. O primeiro proxecto, con 594.000 euros de investimento, custéase ao 70 % pola Deputación e o 30 % o Concello, estando pendente de contratación polo goberno provincial como titular do viario afectado, que despois será cedido e pasará a competencia municipal.
Respecto de Chousa Nova, está redactado o proxecto e só falta a firma do convenio entre ambas as administracións, dixo Cuíña. Neste caso paga o 90 % a Deputación e o 10 % o Concello. O rexedor agarda que as obras comecen co 2019 e estean listas na primavera. Aludiu á pretensión de sacar vehículos do centro urbano, pero sen pechar rúas e buscar unha convivencia cos peóns a través de limitación de velocidade, plataforma única,... Pero recoñecía que antes se debe liquidar a creación de zonas de aparcadoiro.
Plan Xeral de Ordenación
Cuíña desvelou onte que xa se remitiu a documentación requirida pola Xunta sobre o PXOM pero detectaron erros desde Urbanismo que deberán revisarse cando chegue o informe e que se prepara ante Augas de Galicia a solicitude do rexistro das traídas de augas.
Concesión de licenza á granxa porcina de Brey por decreto
Outra polémica xurdida esta semana tamén tivo valoración onte de Cuíña. Neste caso tras denunciar o PP posible trato de favor ao tenente de alcalde, Klaus Brey, ao outorgarse por decreto a licenza de obra para unha explotación de porcino promovida pola sociedade O Salgueiro. O rexedor incidiu na mesma liña xa exposta por Brey sobre a prema de prazos, insistindo en que non pode negarse a outorgar licenza xa que incorrería nun delito ao ter todos os informes favorables. Recoñeceu que o habitual é adoptar o acordo en xunta de goberno local, pero tampouco facelo por decreto da alcaldía supón algo novo, aínda que especialmente ocorre para obras menores.
Resaltou Cuíña que moitas veces chegan os expedientes con moi poucos días de prazo para outorgarse licenzas antes de concluír a convocatoria de liñas de axudas. «Ninguén vai perder unha subvención por non ter unha licenza, e neste caso o secretario dixo que non había tempo para unha xunta de goberno», incidiu, xa que resulta necesario a súa convocatoria e a redacción da acta, demorándose certo tempo.
A petición de licenza desde O Salgueiro foi realizada o 7 de abril e outorgouse o 11 de outubro, pedíndose cando se abre a liña de axudas da Xunta. Tamén apuntou sobre posibles distancias que descoñece posibles incumprimentos, pero hai informes favorables. E respecto da alusión popular á licenza para a súa piscina na Bandeira, Cuíña lembrou que tardou vinte e tres días e que no 2017 a media na concesión de licenzas de obras menores foi de vinte.