A sala de exposicións do campus de Pontevedra iniciou onte un novo camiño seguindo os vieiros de Manuel Moldes. Este espazo situado na Facultade de Belas Artes da cidade leva desde este venres o nome do artista e profesor deste centro, con gran vinculación con Lalín, falecido no ano 2017. A serie Vieiros de Manuel Moldes e tres debuxos inéditos reúnense nunha mostra que se poderá visitar ata decembro.
A antiga Sala X xa é historia ao dar paso á Sala Universitario Profesor Manuel Moldes, como se denomina oficialmente. A mostra reúne as diferentes obras que conforman a serie Vieiros, xunto con tres debuxos que o pintor realizou en 1977 e que nunca se expuxeron previamente. Sara Donoso, exalumna de Manuel Moldes, é a comisaria dunha mostra que pon de relevo o interese do pintor pontevedrés, dixo, «polo debuxo, polo grafismo, non só como disciplina autónoma, senón tamén aplicado á pintura». Ademais, Moldes empezou a desenvolver esa serie pouco despois de iniciar a súa etapa como profesor de debuxo na facultade. Vieiros agrupa tantas imaxes ao óleo sobre lenzo e cartolina con obras en papel milimetrado e debuxos realizados sobre follas de caderno.
Ao acto, que comezou co descubrimento dunha placa, asistiu a súa viúva, a lalinense May Díaz Cacheda, que agradeceu que esa sala da facultade leve o nome de Manuel Moldes. Un centro onde o artista pasou moitos anos dando clase e onde foi moi feliz todo ese tempo. Á inauguración tamén acudiron, entre outros, o reitor da Universidade de Vigo, Pachi Reigosa, e o alcalde pontevedrés, Miguel Anxo Fernández Lores (BNG).