Lalín quere tinguir de laranxa as redes ao berro de en «Eu tamén podo» a celebración da diversidade
LALÍN
O laranxa é a cor da diversidade e co que estes días, pero especialmente mañá, día 3, quérese tinguir as redes sociais. As restricións derivadas do covid-19 obrigaron este ano a que a celebración desta cuarta edición do Lalín Diverso sexa moi diferente. A concentración multitudinaria dá paso a outro tipo de concentración segura a través das redes sociais e levará a cabo tamén a lectura dun manifesto.
A cita está fixada para as 12.30 horas. A lectura do manifesto realizarase a través de Radio Lalín. Onte representantes das asociacións presentaron no Concello as actividades xunto coa concelleira de Igualdade, Begoña Blanco. Estiveron Julia Enríquez de Morea, Anxos Baldonedo de Aspadeza, Olaia Crespo de Cogami e Álex Ferradás de Working Wheels. A estes colectivos súmanse Aranes e a Udiaf, que onte non puideron estar no acto.
Álex Ferradás destacou que este ano a concentración que viña facendo na rúa trasládase para realizala de forma virtual e transmitirase a través da páxina de Facebook e o Instagram do Lalín Diverso.
Pídese a todos os veciños que colaboren colgando fotografías co lema deste ano Eu tamén podo con algo laranxa que simbolice a diversidade.
Estes días xa foron moitos os que enviaron xa algunhas desas imaxes.
As agrupacións foron gravando vídeos para que, aínda que deste xeito complicado que permite o covid-19, poidan participar. A idea dos colectivos é poder despois das vacacións do Nadal chegar aos colexios e institutos. Blanco destacou que «non diverso e non diferente está a riqueza». Ferradás subliñou a importancia de dar visibilidade á diversidade sinalando que non existe vacina nin tratamento para algunhas das enfermidades raras e discapacidades agradecendo ao concello de Lalín o seu apoio e colaboración facendo un chamamento á participación a toda a cidadanía de Lalín nesta xornada.