Así o recolle Saúde Pública no informe que xustifica manter as restricións en ambos os municipios, que apunta que se mantén un risco alto-medio no brote
25 sep 2020 . Actualizado ás 05:00 h.O brote detectado nun bar de Lalín hai semanas acabou por estenderse ao municipio de Silleda. Así o recolle o informe da Dirección Xeral de Saúde Pública datado o día 23 para o seguimento das restricións para prevención da extensión do covid-19 en ambos os municipios, medidas que recomendou manter polo menos unha semana máis.
O informe sinala que a taxa de enfermos subiu en Silleda respecto da anterior semana, e a pesar de baixar en Lalín o municipio segue co número de casos máis alto na comarca dezana, con algo máis do 50 % de casos declarados. E engade: «Hai que salientar que non concello de Lalín se deu un brote que afectou traballadores e clientes dun bar, que semella que amplificou a transmisión xa que posteriormente comezou a aparición de casos entre familiares e, neste momento, parece que está a estender vos casos cara ou concello de Silleda». Indica que o feito de que haxa idades medianas tamén afectadas pode deberse ao tipo de clientes que frecuentan o establecemento de hostalería implicado no brote. Ademais, hai grupos de mozos afectados que poden amplificar a transmisión, pola sintomatología máis leve que poden presentar.
En todo caso, indica Saúde Pública que «este brote segue a ter características de alto/medio risco como é a taxa de incidencia nos últimos 3 días ?risco alto?, a porcentaxe de positividade dás probas PCR realizadas na zona do brote ?risco medio? e a porcentaxe de positividade de probas PCR realizadas aos contactos dous casos detectados, que aumentou desde ou informe anterior e mantén este indicador non nivel de risco alto». Engade que Lalín e Silleda continúan sendo os municipios que concentran a maioría dos casos, e recomenda xa que logo manter as restricións establecidas en ambos.
Desde o pasado día 12
A Consellería de Sanidade impuxo medidas restritivas en Lalín a partir do pasado día 12, ante unha incidencia do coronavirus en aumento desde o 19 de agosto, e con 56 casos activos naquel momento. En Silleda as restricións están vixentes desde o día 17, cando o municipio rexistraba 28 casos activos de covid-19.
Ambos os concellos asumen a desinfección dos institutos
Lalín e Silleda asumen a desinfección de institutos. Na capital dezana o alcalde e edil de Obras visitaron o Aller Ulloa, Laxeiro e Sacro Corazón, comunicando aos seus directores que o Concello asume a súa desinfección «malia non ser de competencia municipal», en patios e zonas comúns exteriores. Será a diario mentres duren as restricións sanitarias, desde onte en Sagrado e desde o luns nos institutos, e cando se levanten as restricións en días alternos.
Crespo dixo que intentarán cubrir as demandas da directora do Aller, Xoana Mouriño, para dotación dalgún colector máis no exterior do centro e reforzo de limpeza do pavillón municipal, que utiliza o alumnado. Coa inclusión destes centros, son 9 os que desinfecta a brigada municipal específica, con dous operarios.
Pola súa banda, Silleda prosegue as desinfeccións periódicas nos centros educativos, unha lista á que acaba de incorporar o IES Pintor Colmeiro polo inicio das clases esta semana.
Positivos en centros da zona
Na relación de positivos por covid-19 que fai pública Educación, desaparecen García Barros e gardería do Pontiñas. Seguen, cun caso cada un, Laxeiro, Aller Ulloa, Colmeiro e Golmar.
Denunciado un bar do rural de Agolada con clientes sen máscaras e por incumprir o horario
Patrullas da Garda Civil inspeccionaron lugares de lecer da comarca dezana a pasada fin de semana. Na madrugada do domingo cursaron denuncia nun bar do rural de Agolada, por exceder o horario de peche permitido, e por estar no interior do establecemento presentas sen portar as máscaras e sen gardar as preceptivas distancias de seguridade. Ao parecer, participaban na celebración dun aniversario.
Lalín está en 40 casos activos, 21 Silleda e A Estrada 15, con 2 usuarios en Domus Vin
Nos dous municipios con restricións as cifras son menores que cando se tomaron esas medidas. En Lalín contabilizábanse onte 40 casos activos, e Silleda descendeu a 21, cun veciño que segue na UCI.
Haberá feira na Bandeira
O Concello fai un chamamento para non baixar a garda e cumprir coa normativa. En canto á feira do martes 29 na Bandeira celebrarase, reforzando a vixilancia en cuestións como o uso de máscaras.
Na Estrada un activo máis: son 15, cun brote. De 880 test realizados, foron positivos 17, con taxa de positividad do 1,9 %. Na residencia Domus Vin de Lalín negativizó a última traballadora pendente, polo que ninguén do persoal ten xa covid-19. Quedan só dous residentes, pendentes de probas serológicas para saber se o superaron tamén.