O empresario Antonino Albano pon en marcha alí un establecemento dedicado á venda de produtos de calidade con selo da capital dezana
14 ago 2020 . Actualizado ás 08:00 h.É unha realidade que a pandemia de covid-19 golpeou con forza a multitude de negocios, causando, por desgraza, a desaparición de moitos deles. En tempos tan complicados como estes, parece que agudizar o enxeño e lograr adaptarse é a única forma de seguir en pé. Fai sete anos que Antonino Albano e a súa familia chegaron a Lalín desde Venezuela e abriron as portas da súa pizzería-parque de colchóns inchables, o Pizza Park, en Lalín. Con todo, a crise sanitaria prexudicou seriamente a este establecemento, pois estaba orientado a familias con nenos e á celebración de grandes festas de aniversarios. «O parque pasou a ser un problema», conta o dono; a pesar de pechalo temporalmente, a pizzería segue sufrindo a perda de clientes.
Ante esta situación, Antonino e a súa muller optaron por diversificar a súa actividade e buscar unha alternativa que puidese axudalos a saír adiante. Dese modo, decidiron abrir Lalín Point o pasado 31 de xullo, unha tenda creada co obxectivo de promocionar produtos lalinenses noutras cidades. «Había tantos produtos na zona que pensamos que era necesario dalos a coñecer. Pan, queixo, fiambre... son cousas que sempre se van vender, con pandemia ou sen pandemia», comenta Antonino.
Situada en Cangas de Morrazo -na rúa Eirado do Sinal-, a tenda vende produtos de Embutidos Lalinense, queixos do Pazo de Anzuxao, pan da Panadería Fernando e mel de Casa Paxaro. «Tras sete anos en Lalín, tiñamos experiencia comercial con estas empresas. Comentámoslles o plan e a todos lles pareceu boa idea. Pasaron de ser os nosos provedores a aliados estratéxicos», explica Antonino, que non descarta vender os produtos de máis empresas de alimentos locais se estas se interen polo proxecto.
Lalín Point trátase da primeira tenda da familia, que ata agora sempre se dedicou ao negocio da restauración. Respecto da decisión de situala en Cangas, Antonino explica que «iamos alí de vacacións e sempre viamos bastante movemento, sobre todo co turismo, polo que nos pareceu un bo lugar». O establecemento, que está aberto todos os días da semana, de 10.00 a 14.30 horas, é atendido por Antonino e a súa muller -os días que un se encarga da pizzería, o outro leva a tenda, e viceversa-, pois como explica o dono «de momento queremos estar presencialmente na zona para dar un trato persoal».
Estenderse a toda Galicia
Desde a súa apertura, parece que Lalín Point tivo boa aceptación entre os veciños de Cangas, tal e como comenta o propietario: «Os produtos xa eran ben coñecidos por todo o público, o que máis triunfa é o pan e a conserva de cocido lalinense». Antonino conta que no futuro, se todo vai ben, teñen pensado abrir tendas nas catro provincias: «Eu considérome un fillo adoptivo de Lalín. Talvez aprecio todo máis porque veño de fóra, pero son un fiel admirador tanto do alimento como da contorna e por iso quero difundilo».
Así, Antonino converteuse nun auténtico embaixador de Lalín, levando non só a gastronomía local ao exterior, senón tamén difundindo as fortalezas do pobo: «Aos clientes procuro namoralos falándolles de Lalín, para que vaian descubrilo. Coñecen a Feira do Cocido, pero eu dígolles que ese é precisamente o día que menos poden coñecer o pobo. Aquí hai natureza, astronomía, historia ... Lalín non só é o cocido». E Lalín Point é un espazo desde o que aproximarse, desde Cangas á capital dezana.