O Clube Rugby Coreti Lalín enfróntase hoxe en Santiago ao equipo local ?campo do Campus Sur da USC, 18.30 horas?, unha formación que non está obtendo esta tempada bos resultados e á que lle está custando adaptarse ao maior ritmo de competición que ten este ano a liga tras a reunificación realizada, pero dispón dun quince moi novo e con xogadores de moi boa condición física e gran velocidade, polo que os abellóns prevén un test difícil.
O adestrador dos lalinenses, Javier Martínez, poderá contar coa maioría do persoal, coas excepcións de Pablo e Bryan, que arrastran lesións de longa duración, así como de Juan Viana, quen sufriu unha torcedura de nocello no último partido. Os abellóns buscarán cambiar a imaxe da pasada xornada, na que non pasaron do empate ante o Zalaeta coruñés, nun partido no que só se puido ver bo xogo a refachos, faltando máis continuidade. O equipo de Lalín intentará impor o seu maior peso e experiencia na dianteira, para así ir gañando metros e desgastando aos santiagueses. Son quintos na táboa, e buscan unha vitoria que lles afiance na posición e mantéñalles preto do cuarto. O sub-14 xoga ás 16 horas no Cortizo ante o CRAT da Coruña; o senior feminino vai mañá a Ferrol.