Dez clubs terán presencia mañá no Cortizo nesta xornada
15 novs 2019 . Actualizado ás 05:00 h.O estadio Manuel Anxo Cortizo acollerá mañá a segunda concentración das escolas promovida pola Federación Galega de Rugbi e organizada polo Coreti Lalín. Participarán case 400 nenos con idades entre os seis e doce anos dunha decena de clubs galegos, nunha xornada de fomento deste deporte pero á vez lúdica, na que ademais os abellóns decidiron, como o pasado ano, activar unha campaña solidaria e recoller material escolar para Carabelo.
Na presentación de onte, o presidente do Coreti Rugbi Lalín, Álex Ferradás, incidiu en que se trata de torneos non competitivos, para as categorías sub-6, 8, 10 e 12, co fin de que os xogadores poidan mellorar e expresar sobre o campo o traballo nas escolas. Por quinta vez organizan esta concentración en Lalín, a terceira da actual directiva. Haberá múltiples partidillos cos xogadores repartidos en equipos en cada categoría de idade. Comezará ás 11.00 e acabará sobre as 13.00 horas, cun avituallamiento para todos os participantes, ademais de repartirse froita e auga durante a concentración.
Ferradás agradeceu o apoio do Concello para a cesión de instalacións e xestión da ambulancia, entre outras cuestións, así como o dos patrocinadores. Pola súa banda, o edil de Deportes, Avelino Souto, destacou o interese municipal por apoiar este tipo de iniciativas.
Tanto o presidente como Panteira, directivo do Coreti, remarcaron o incremento de xogadores de base en Lalín esta tempada, cunha trintena federados aos que suman outros máis dos colexios. O club ten 105 fichas e tras tres anos sen equipos propios de base ten en sub-8, 12 e 14, o que lles permite competir. Panteira incidiu en que a concentración busca achegar este deporte tamén aos pais, que coñezan a realidade do rugbi, e que os xogadores teñan os seus primeiros contactos coas melés. A exjugadora e actual concelleira, Begoña Blanco, quixo que se valorará o esforzo altruísta en Lalín para que o rugbi gañe peso.
automobilismo Curso para actuar en accidentes en eventos deportivos de motorGrave lesión de nocello da «abellona» Vanesa García
O circuíto da Madalena en Forcarei acolleu o primeiro curso de como actuar ante accidentes en eventos deportivos de automobilismo, organizado por Efesgal e coordinado polo piloto Juan Campos. Participaron 24 alumnos, que asistiron a sete clases teóricas e seis talleres prácticos, empregándose tres coches de competición.
Na presentación dos directivos do Coreti Lalín quixeron mandar unha mensaxe de ánimo á abellona Vanesa García. A xogadora do equipo feminino sufriu unha grave lesión nun adestramento, rompéndose en máis dun punto o nocello, sendo trasladada en ambulancia. Precisamente onte tiña que pasar polo quirófano. Desexáronlle unha pronta recuperación aínda que estará bastante tempo apartada dos terreos de xogo.
Sen deixar a actualidade dos equipos sénior, o masculino terá este sábado unha saída complicada. A partir das 16.30 horas enfrontarase ao Ferrol no campo da Malata. Os abellóns mídense ao actual líder da competición, imbatido e con catro vitorias, por tan só dúas os visitantes.
Mentres, o cadro feminino xogará en casa, pero farao o domingo. As abellonas enfrontaranse ás 17.30 horas ao Muralla de Lugo no Cortizo. As visitantes, segundas na táboa, levan tres vitorias, por tan só dúas as lalinenses, cuartas.