No único municipio cunha muller á fronte do consistorio, unha nena presidiu onte o pleno infantil
12 dic 2018 . Actualizado ás 05:00 h.Os veciños de Forcarei outorgaban no 2015 a maioría absoluta ao PP, á lista encabezada por Belén Cachafeiro. Na actualidade ostenta a única alcaldía en feminino das comarcas. Onte compartiu «funcións» con Clara Troitiño, a quen os seus compañeiros escolleron no pleno infantil como rexedora. Aínda que non deixa de ser unha anécdota, en Forcarei mandan elas.
Esa sesión tan especial puxo colofón a unha xornada onde unha vintena de alumnos do colexio de Soutelo de Montes gozaron dunha xornada especial con motivo do corenta aniversario da Constitución. Xunto aos seus docentes foron recibidos no consistorio por Belén Cachafeiro e o edil José Francisco Bouzas, para visitar despois as distintas dependencias municipais acompañados por María Mato. Puideron interesarse polo funcionamento da Administración local nos seus distintos servizos.
O salón de plenos foi o último destino dos escolares, onde visionaron un vídeo sobre os dereitos dos nenos para despois tomar posesión como concelleiras, recibindo un diploma acreditativo para votar despois a Clara Troitiño de alcaldesa. Despois non faltou un debate con intervencións entre elocuentes e divertidas para aprobar tres propostas co obxectivo de mellorar a vida en Forcarei. E decantáronse por accións para as persoas máis necesitadas, o coidado do medio ambiente e dotar de herba ao campo de fútbol. Non faltaron os rogos e preguntas, recibindo o centro de Soutelo unha doazón para a súa biblioteca dunha publicación que recolle todas as constitucións da historia de España.