Morre agardando a ambulancia: «Se volve pasar, que haxa un mínimo de servizos que co non tivemos»
DOZÓN
A familia dun falecido nunha festa en Dozón denuncia que agardou máis de 45 minutos
16 oct 2019 . Actualizado ás 07:39 h.O tempo pasa amodo en Cardelle (Dozón). En casa de Pepe -84 anos e aínda con forza para coidar das vacas- están a súa nora Carmen e os seus netos Jesús e José Antonio. Arróupano o día despois de enterrar a Jesús Pérez García, o seu único fillo, que faleceu o domingo pasadas as tres da madrugada na festa do Sisto, tras agardar máis de 45 minutos por unha ambulancia que só chegou para que certificasen a súa morte.
«A nós avisounos un amigo seu, que estaba na festa, de que estaba mal. Estabamos durmindo na casa e alá fomos», relatan os fillos do falecido, Jesús e José Antonio. Chegaron antes que a ambulancia e atopáronse ao seu pai tirado no chan: «Estaba unha persoa reanimándoo, e unha rapaza collíalle o pulso». Jesús preguntou se avisaran: «Dixeron que habería media hora. Eu volvín chamar ao 112, e dixeron que tardaban cinco minutos. Logo mandei chamar a meu irmán». E conclúe: «Desde a primeira chamada foron máis de 45 minutos».
Engade que o persoal médico xa percibiu ao chegar que non había nada que facer: «Nin o reanimaron nin nada. Íano entubar na boca e co osíxeno, pero xa non descolocaron a ferramenta», afirma Jesús. O seu irmán José Antonio corrobora: «Os da festa foron os que máis fixeron». Que lle ocorreu a Jesús Pérez? Os seus fillos sinalan, polo testemuño dos seus amigos, que estaba comendo un petisco e se atragantó. O seu amigo fíxolle unha manobra e expulsou o pan: «Pediu un pano para limpar a boca, apartouse uns metros da xente e caeu desplomado ao chan. Tivo que darlle algo», relata Jesús, que engade que o seu pai «non tomaba unha soa pastilla», á vez que asegura que non estaba ebrio.
«Habería unha esperanza»
Lamenta a tardanza da ambulancia: «Habería unha pequena esperanza; se cadra cunha pequena manobra salvaríase, ou non, pero polo menos facerlla». Por iso demandan máis medios sanitarios: «Se volve pasar, que haxa un mínimo de servizos, que con el está demostrado que non os tivemos». Non prevén accións legais: «Con reclamar non vai volver con nós».
Desde o 061 indican que ás 3.19 horas recibiron alerta dunha persoa mareada e con posible intoxicación etílica; 15 minutos despois alertábase de que estaba inconsciente. As dúas ambulancias de Deza estaban ocupadas en casos de risco vital, e unha delas chegou ao Sisto 46 minutos despois do primeiro aviso.
Críticas ao PP por negarse a dar explicacións no Parlamento
A morte dun paciente que estivo máis de 45 minutos agardando por unha ambulancia no municipio pontevedrés de Dozón prendeu este martes a mecha no Parlamento galego, informa Domingos Sampedro. Os grupos da oposición reclamaron a comparecencia urxente do conselleiro de Sanidade, Jesús Vázquez Almuíña, para que dese explicacións sobre un caso que vinculan directamente coa «falta de recursos» na atención sanitaria.
A petición de comparecencia non tivo éxito. O PP reprochou que a oposición utilice para facer política o que o seu portavoz, Pedro Puy, cualificou de «desgraciados acontecementos», unha estratexia que, ao seu xuízo, «retrata a quen propón este tipo de debates». Dixo que o Goberno galego analizará o ocorrido en Dozón e, cando teña toda a información, trasladaraa á Cámara.
O dique de contención posto polo grupo maioritario do PP ao vetar a comparecencia de Vázquez Almuíña provocou a protesta airada dos grupos da oposición. O portavoz socialista, Xoaquín Fernández Leiceaga, manifestou que a Xunta debería ser a primeira interesada en abordar o asunto e esixiu a máxima transparencia en casos como este, que son «evitables».
Manuel Lago, do Grupo Común dá Esquerda, insistiu en que o conselleiro debería ser o primeiro interesado en dar explicacións, e tachou de «indigno» que o Goberno galego se esconda vetando unha comparecencia, como tamén fixo con outra petición dirixida á conselleira de Política Social, Fabiola García, polas condicións laborais do persoal das residencias de maiores.
O BNG optou por espremer ao máximo o regulamento da Cámara para forzar un debate, e será Ana Pontón a que expoña a pregunta a Feijoo na sesión de control, ante a negativa do conselleiro a comparecer. Luís Villares , de En Marea, lamentou que o grupo maioritario lle reste importancia a este caso.