A Xunta autoriza a transferencia a Cerdedo da vía que une Caroi e Carballedo
CERDEDO
Durante o Consello da Xunta celebrado onte, autorizouse o cambio da titularidade a favor do Concello de Cerdedo do tramo inicial da estrada provincial EP-0401 que une os núcleos de Caroi e Carballedo. Tanto o Concello como a Deputación de Pontevedra asinaron un convenio no que estableceron a obrigación da entidade municipal a solicitar a transferencia desta vía.
Pola súa banda, a administración provincial acordou aprobar o cambio de titularidade a favor de Cerdedo e emitiu un informe favorable para este proceso de intercambio de 450 metros lineais da estrada EP-0401, do punto quilométrico cero ao 0+450, no núcleo da Chan. Con este cambio na titularidade, será o órgano municipal o que asuma as competencias para actuar neste tramo, asumindo a súa conservación e mantemento.
Renovación da iluminación
O Concello de Cerdedo tamén retomou onte as tarefas de renovación da iluminación municipal con luces LED. Os traballos reactiváronse no lugar de San Martiño.