Acepta cinco anos de cárcere por intentar atropelar ao alcalde de Agolada
AGOLADA
Está previsto que non ingrese no cárcere por estar en tratamento por alcoholemia no País Vasco.
20 abr 2021 . Actualizado ás 21:01 h.José Manuel S. G., o home que en setembro do 2019 intentou atropelar ao alcalde de Agolada , asumiu este martes unha condena de cinco anos de prisión como autor de varios delitos. A pesar de recibir esta pena, en principio non terá que ingresar en prisión, xa que, previsiblemente, os maxistrados accederán a suspender o seu ingreso no cárcere dado que está en tratamento por alcoholemia no País Vasco. En todo caso, a maxistrada precisou que se pronunciará na execución da sentenza.
Deste xeito, a resolución recollerá que o procesado, para quen inicialmente se pedían sete anos e tres meses de cárcere, será condenado a catro anos e un día e o pagamento dunha multa de 540 euros por un delito de atentado sobre a figura do rexedor municipal. Recoñeceu, deste xeito, que tratou de arroiar co seu coche a Luis Calvo cando se decatou da súa presenza nas proximidades dun bar.
Dáse a circunstancia de que, aproximadamente unha hora despois, volveu pasar por este punto do municipio de Agolada embistiendo co seu coche ao do rexedor. Os danos ascenderon a 2.500 euros, que abonou a aseguradora, mentres o acusado aceptou o pagamento doutra multa de 540 euros por danos.
O resto de delitos asumidos ante a Audiencia de Pontevedra son contra a seguridade viaria —540 euros de multa e ano e medio sen carné—; desobediencia —seis meses de prisión e un ano de retirada do permiso de conducir—; un segundo cargo de atentado —seis meses de cárcere—; e un delito leve de lesións —noventa euros de multa—. E é que, tras encaixar o seu coche contra o do alcalde, encarouse e insultou aos axentes da Garda Civil chegando a agredir a un deles, así como negarse a soprar no control de alcoholemia. Á hora de cuantificar as penas estimouse a existencia dunha atenuante por embriaguez.
Luis Calvo manifestou que, pola súa banda, «esta perdoado», antes de asegurar que «esta xente haberá que tratala porque entendemos que non se encontra cos cinco sentidos». «Non tiñamos nada persoal, nin moito menos. Facía problemas en todos os lados. Espero ben que o curen», engadiu.