O Recreo Cultural estradense interrompe o seu campamento por un positivo
A Estrada
A Estrada, Lalín e Silleda, municipios con máis casos activos
15 jul 2021 . Actualizado ás 05:00 h.As comarcas de Deza e Tabeirós non son alleas ao aumento de casos que se está producindo tanto a nivel autonómico como nacional. A pesar de ser zonas cunha gran cantidade de persoas vacinadas, a laxitud nos comportamentos tras o desmaio de certas restricións provocaron un preocupante crecemento no número de casos activos ao longo do mes de xullo.
Tabeirós-Terra de Montes
Na comarca de Tabeirós o núcleo con máis poboación, A Estrada, é o que presenta un maior número de contagios. Ao peche desta edición os casos situábanse en 24, tras unha subida de catro relacionado cunha viaxe a Sanxenxo. Desde o Servizo de Atención Primaria sinalan que a expansión do covid na localidade podería continuar nos próximos días con máis positivos. A incidencia acumulada a 14 días atópase en 161 casos por cada 100.000 habitantes, a 7 días en 73 e a 3 en 49 casos. A media de idade dos contaxiados é de 29 anos, perfil similar ao do resto de España e Galicia.
No municipio de Cerdedo tamén se acenderon as alarmas coa aparición de 4 casos activos nas últimas 24 horas, o que supón un aumento significativo na zona.
Deza
En Lalín, o número de casos situábase onte xa en 22, o que supón unha nova subida. Nos últimos días pasouse de 11 a 14 e de 14 a 22. A incidencia acumulada a 7 días por cada 100.000 habitantes é de 74 e a 14 días, tamén por cada 100.000 habitantes, elévase xa a 104. En Silleda o número de contaxiados aumentou nun ata acadar os 18 activos, unha subida menos agresiva que nos días anteriores, pero igualmente preocupante. En Agolada o cómputo subiu xa a tres casos activos. Dous dos contaxiados son de fóra e pasan en Agolada o confinamento e a outra persoa positiva atópase illada na Coruña.
O Recreo Cultural da Estrada anunciou a interrupción do seu campamento estival ata novo aviso pola aparición dun caso positivo nunha monitora de 31 anos das instalacións. Desde a directiva informaron que non é un caso relacionado coas actividades que se imparten no campamento e que todos os contactos directos serán sometidos a un cribado nas próximas horas.