Os lodos son visibles nunha das balsas da EDAR que verte á canle fluvial
14 ago 2018 . Actualizado ás 10:29 h.A reforma da depuradora de Aguións (A Estrada) non foi capaz de erradicar o problema das verteduras ao río Liñares. Veciños da zona volveron a facer notar nos últimos días que de novo se están vertendo á canle fluvial lodos sen tratar procedentes da estación depuradora de augas residuais (EDAR) do municipio. Segundo explican, a acumulación destes lodos na balsa de incorporación das augas procedentes da EDAR ao caudal do río destinado á minicentral eléctrica de Barbude é notoria a primeira ollada. Estas augas acaban o seu ciclo directamente no río Liñares. Ademais, segundo indican, nas inmediacións o problema tamén se fai notar polo mal cheiro.
O problema das verteduras da depuradora estradense ao río tivo un dos seus episodios máis mediáticos a principios do ano pasado. Entón, tras as críticas dos veciños e dos grupos da oposición municipal, o goberno encargara á empresa responsable da xestión e mantemento da depuradora, Viaqua, un informe sobre o seu funcionamento. Cos resultados en man, o Concello atribuíu a vertedura de fecais ao río a un pico no caudal recibido pola depuradora, que tería derivado ao aliviadoiro situado despois da área de pretratamiento augas sen rematar o seu proceso de depuración habitual.
Tras aquel episodio, o PSOE encargara a un laboratorio unha análise de mostras de auga tomadas no río Liñares nas que se detectaron «incontables» colonias de bacterias procedentes de restos fecais nas augas situadas máis abaixo da depuradora. O BNG tamén esixiu explicacións e medidas correctoras ao goberno local. O asunto chegou mesmo ao Parlamento europeo da man da eurodeputada de En Marea, Lidia Senra, que visitou a zona afectada por mediación de Móvete e asegurou que a vertedura de augas a medio depurar á canle fluvial incumpre a normativa europea en materia de protección da saúde e a biodiversidade.
Aquela polémica concluíu fai case unha ano -en setembro do 2017- coa adxudicación a Viaqua da reforma da depuradora para mellorar o seu rendemento e tratar de atallar as verteduras ao río. As obras custaron 12.000 euros. levou a cabo unha variación no circuíto para que os sobrantes da depuradora que antes se aliviaban verténdoos directamente ao río fosen bombeados para devolvelos ao comezo do ciclo de depuración para o seu tratamento. Instalouse ademais unha reixa autolimpiable na zona de entrada do caudal de augas residuais á depuradora, onde se separan as augas fecais dos residuos que non deberían guindarse ao inodoro. Tamén se cambiaron dúas das bombas que lanzaban a auga cara á zona de decantación por unhas de menor caudal, para mellorar o proceso de sedimentación.
A pesar de todo, as melloras non foron capaces de evitar a reaparición dos lodos. O propio goberno recoñecía no seu día que estas obras non eran a solución idónea para unha depuradora que se construíu no 2005 con capacidade para 10.000 persoas pero que está infradimensionada.