López amplía a súa maioría absoluta para afrontar o seu cuarto mandato na Estrada
DEZA
PSOE e Móvete foron os damnificados, mentres subía o BNG
29 may 2023 . Actualizado ás 01:26 h.O Partido Popular logrou ampliar a súa fenda co resto das forzas políticas que concorrían aos comicios na Estrada. José López ostentará unha maioría aínda máis ampla para afrontar o seu cuarto mandato consecutivo, co respaldo a un proxecto que supuxo xerar importantes infraestruturas principalmente no centro urbano, con outras xestándose entre as que destaca a ampliación da autovía ou o novo xulgado, xunto a equipamento deportivo.
De doce a trece concelleiros subiu a súa representación o PP tras sumar o 57,64 % do total de votos con 6.873. Mesmo estiveron ata o final na pelexa polo décimo cuarto, pero Movemento Veciñal Estradense (Móvete) lograba in extremis lograr representación na corporación. O PSOE de Luis López Bo perdía un dos seus seis edís, quedando en cinco tras cultivar 2.948 papeletas, que supuxeron o 24,72 %. Pola súa banda, o BNG que lideraba Xoán Reices convertíase na terceira forza política con dous concelleiros, duplicando representación tras cultivar 1.327 apoios nas urnas, é dicir, o 11,12 % do total.
A outra cara da moeda, xunto á formación socialista, protagonizábaa Móvete. Mar Blanco será na nova corporación a única representante desta forza política, tras contar con dous concelleiros no 2019. Tan só cultivaron o 5,41 % dos sufraxios emitidos, con 218 papeletas ao seu favor.
Os resultados da pasada xornada referendan o apoio veciñal á liña de traballo marcada polo PP tras tres mandatos. José López sae de novo reforzado cun dos pesos pesados do partido na provincia pontevedresa e mesmo a nivel galego. Agora queda ver se esgotará os catro anos a cargo de a alcaldía ou se, de producirse novos cantos de sirena desde a Xunta, esta vez opta por aceptar algún cargo. Ata agora non lle convenceron.