Son case 200 persoas máis que as que se contabilizaban na zona no 2020
24 oct 2021 . Actualizado ás 05:00 h.Preto de 2.400 das comarcas de Deza e Tabeirós-Terra de Montes, en concreto 2.391, puidéronse acoller ao bono social eléctrico, segundo os datos facilitados estes días pola empresa Naturgy, a principal comercializadora de enerxía eléctrica. Son preto de 200 familias máis que as que se contabilizaban na zona hai case un ano. Os datos facilitados pola empresa eléctrica en decembro do 2020 guindaban unha cifra de 2.194 beneficiarios do bono social eléctrico na zona. Agora, case un ano despois, son 197 máis.
Por concellos, neste último ano produciuse un aumento no número de beneficiarios en todos os concellos da zona. Lalín continúa sendo o municipio das dúas comarcas que conta cun maior número deles con 848 fronte aos 779 que se contabilizaban en decembro do pasado ano, o que supón un incremento de 69 familias que solicitaron o bono e cuxas peticións foron aprobadas polo goberno ao cumprir os requisitos esixidos para dispor do.
A Estrada ocupa o segundo posto en canto a número de beneficiarios. Son 792, o que supón 52 máis que o ano anterior, nos que a cifra era de 740. En Vila de Cruces son 194 fronte aos 177 do ano pasado, o que supón un aumento en 17 familias máis estes descontos.
En Agolada o aumento foi igual de significativo con 17 máis acadando os 115 beneficiarios fronte aos 98 que se contabilizaban en decembro do ano pasado. En Silleda , Naturgy cifra en 152 o número de clientes con bono social sumando 13 máis que o ano anterior no que había 139.
En Forcarei suman 85 fronte aos 82 de decembro do ano pasado, o que supón un aumento de tres beneficiarios máis.
En Dozón son oito máis que o ano anterior. O municipio conta con 45 familias con bono social eléctrico e o pasado ano eran 37. En Cerdedo-Cotobade , o número tamén foi crecendo neste último ano e acadaban estes días os 71 clientes con bono social fronte aos 64 de hai un ano. En Rodeiro , o número de beneficiarios ascende nestes momentos a 89 fronte aos 78 que se contabilizaban no mes de decembro do 2020, o que supón un aumento de 11 no último ano. O número de beneficiarios é de 1.443 en Deza e de 948 en Tabeirós-Terra de Montes.
Unha vixencia de dous anos e recordatorio aos beneficiarios a través da factura da luz
Naturgy lembra que a vixencia do novo bono social, implantado a través do Real Decreto de outubro do 2017, é de dous anos. Tras ese período é necesario renovalo. O decreto establece que as comercializadoras deben informar os seus clientes dous meses antes de que caduque, a fin de darlles tempo para tramitar a renovación.
Desde a empresa explican que «imos máis aló e en todas as facturas aparece sempre a data de renovación». Sinalan que ademais diso, cando se achega a data de fin da vixencia do bono social, realizan unha campaña personalizada con cada cliente que ten o bono próximo a caducar, para que inicie os trámites de renovación «porque queremos que os nosos clientes que teñen dereito a esta bonificación poidan gozala».
Neste sentido sinalan que aínda que o último ano se produciu un aumento de beneficiarios na zona polo bono social, en xeral, non están constatando un incremento moi grande ao fío do aumento do prezo da luz. Lembran que para ser beneficiario destes bonos, hai que cumprir unha serie de requisitos e que é o goberno central, e non as empresas, as que aceptan ou non as peticións.
Un mecanismo regulado de forma directa polo goberno estatal
O bono social eléctrico ten como obxectivo protexer aos consumidores máis vulnerables e con menores posibilidades económicas e é un mecanismo regulado directamente polo goberno estatal que é quen recibe e resolve as solicitudes das familias para poder contar co bono. A través del establecer tres categorías de clientes que se atopen nesa situación de vulnerabilidade e que en función desta terán diferentes descontos sobre o Prezo Voluntario para o Pequeno Consumidor (PVPC).
No 2017 producíronse cambios respecto dos criterios para acollerse ao bono social e que se recolleron nun Real Decreto. O Ministerio anunciou no 2018 dúas prórrogas e finalmente fixouse o 31 de decembro como o prazo para acreditar a condición de consumidor vulnerable. Desde o 2019 calquera cidadán pode tramitar o bono social en calquera momento. Se cumpre os requisitos de renda pode beneficiarse de descontos de entre un 25 e un 40 % na factura da luz da comercializadora que desexen. Os requisitos poden consultarse en www.comercializadoraregulada.é..