A familia que perdeu casa e taller recibe 10.953 euros da conta solidaria de Cáritas
19 novs 2019 . Actualizado ás 05:00 h.A familia Neira Iglesias acaba de recibir unha nova inxección económica para recuperar a súa vida tras o devastador incendio que o pasado 10 de outubro arrasou a súa vivenda e o taller mecánico que constituía o seu medio de subsistencia.
Tras transcender a noticia e a situación de desamparo desta familia de Berres, que no momento da traxedia carecía de seguro, as mostras de solidariedade multiplicáronse. Activáronse iniciativas nas redes sociais, realizáronse petitorios porta a porta e abriuse unha conta solidaria a través de Cáritas. A conta bancaria pechouse estes días cun importe total ingresado de 10.953,14 euros. A agrupación estradense de Cáritas, en compaña do responsable da oficina de Abanca na Estrada e a edil de Asuntos Sociais, Amalia Goldar, fixeron entrega onte a Manuel Neira Ferro do cheque que lle permitirá iniciar a reconstrución da vivenda. Os expertos consideran que, aínda que a estrutura quedou tocada, un bo reforzo da planta baixa garante a súa seguridade e a súa habitabilidade futura.
Manuel Neira quixo dar as grazas a todas as persoas que achegaron o seu gran de area na conta solidaria activada por Cáritas. Ademais da evidente axuda económica, a xenerosidade dos estradenses está a proporcionar tamén moito ánimo aos damnificados para saír da fochanca. «Non hai palabras para agradecer unha axuda que ademais de ser vital para nós neste momento nos está dando moitos ánimos. Só temos palabras de agradecemento. Outra cousa non temos para dar», comentaba Manuel Neira tras a rolda de prensa de entrega oficial do cheque. «Temos que agradecer moito o apoio dos veciños, do Concello, dos cidadáns da Estrada e tamén de moitos de fóra da Estrada, porque nos chegaron apoios de Silleda, de Cruces, de Santiago... E cada gran de area conta», explica.
Ademais dos 10.953 euros da conta solidaria de Cáritas, a familia recibiu outra entrega de 11.300 euros dos veciños, que continúan coa súa campaña de recadación porta a porta na zona e agardan incrementar a achega.
Na rolda de prensa, o tenente alcalde, Juan Constenla, informou tamén a Manuel Neira de que as empresas Teimosa e Edelec ofrecéronse para realizar altruistamente a nova instalación eléctrica na vivenda. Tamén Dalarjo e outras empresas de ferros e artigos para a construción ofreceron materiais á familia.
Reforzo do baixo
Segundo explica Manuel Neira, o máis urxente é a reposición do tellado. No entanto, as intensas choivas das últimas semanas han obrigado a pospor estes traballos. De momento só se puideron realizar traballos de rebo. En canto cheguen os materiais, a familia pretende comezar coas obras de reforzo da planta baixa do edificio para asegurala e evitar futuros perigos. «Esperemos que non veñan máis negras», comentaba o propietario con resignación.