Unha denuncia en Lalín deu orixe a unha operación que desarticulou unha organización criminal internacional que estafaba a empresas
DEZA
Houbo un total de 21 detidos, 78 contas embargadas e 5 millóns de euros blanqueados
21 jul 2019 . Actualizado ás 19:55 h.Axentes da Garda Civil e a Policía Nacional desarticularon unha organización criminal internacional dedicada a cometer estafas mediante a modalidade do phishing, á falsificación de documentos públicos e branqueo de capitais. A operación, denominada Ciao-Estribo, iniciouse en Lalín e en Xaén, tras senllas denuncias interpostas na Garda Civil da localidade pontevedresa e na comisaría de Xaén. En Lalín, representantes dunha empresa denunciaron ter sido vítimas de dúas estafas por valor de 23.645 euros e outra de 3.479 euros. En Xaén, un empresario denunciou que lle estafaron 132.000 euros.
A operación foi levada a cabo polo equipo de Policía Xudicial de Lalín, a Unidade Orgánica de Policía Xudicial da Comandancia da Garda Civil de Pontevedra e axentes da Unidade de Delincuencia Económica e Fiscal (UDEF) da Comisaría de Xaén.
Usurpación de datos
Segundo a Garda Civil os presuntos autores gañábanse a confianza de empresas legais mediante acordos comerciais, apoderándose dos seus datos empresariais, das súas claves bancarias e correo electrónico. A operación operaba en todo o mundo e atopábase perfectamente estruturada. Os investigadores comprobaron que as persoas que presentaron as denuncias foran estafados por Internet usurpándolles as súas contas de correo electrónico logrando levar grandes cantidades de diñeiro.
A investigación e a análise detallada da documentación económica, bancaria, fiscal e financeira levou á localización por parte dos investigadores mediante medios técnicos e informáticos a dar coa organización desarticulada.
Os axentes detiveron xa a 21 persoas, realizando 9 rexistros en Málaga e Castelló e interviñeron ordenadores, cartóns bancarios, multitude de documentación, xoias valoradas en máis de 4.000 euros e 17.800 euros en metálico. Embargáronse 78 contas bancarias e varios vehículos de alta gama, un deles valorado en 150.000 euros e logrouse esclarecer un branqueo de capitais de cinco millóns de euros.
Conexión cerámica
Unha vez que se facían co diñeiro das vítimas, os presuntos autores desviábano a numerosas contas correntes que a organización abría con documentación falsa e que tiña como destino final determinadas empresas de cerámica situadas en Castelló. Desta forma blanqueaban o diñeiro recibido ilicitamente mediante exportacións de material que enviaban ata Nixeria.
Dada a envergadura da operación, os axentes contaron coa colaboración de diferentes especialistas documentais de numerosas embaixadas de Europa e África. A Garda Civil explica que a organización criminal tiña acceso a pasaportes roubados e falsificados de multitude de países e destinados a dificultar a investigación xa que os supostos titulares dos pasaportes non existían fisicamente polo que era imposible localizalos. Os investigadores puideron constatar que a actividade da organización levaba a cabo en España, Holanda, Chipre, Curaçao, Ucraína, México, Suíza, Alemaña, Dinamarca, Singapur , Reino Unido e Estados Unidos.
No marco da operación embargáronse 78 contas bancarias, localizando e recuperando gran cantidade de diñeiro oculto. levaron a cabo rexistros en Málaga e en Castelló. En Málaga foron catro e foron detidas seis persoas e intervida multitude de documentación, aparellos informáticos, 2.955 euros en metálico e xoias valoradas en máis de 4.000 euros.
En Castelló as forzas de seguridade efectuaron dous rexistros domiciliarios e tres en empresas relacionadas coa cerámica. A consecuencia destas actuacións foron detidas 15 persoas e os axentes incautáronse de documentación, cartóns bancarios, 16.350 euros en metálico e un vehículo de alta gama valorado en 150.000 euros.