Atenderá a toda a comarca dezana, con 45 pacientes nun primeiro momento
14 mares 2019 . Actualizado ás 21:31 h.O Consello da Xunta autorizou onte xoves a contratación dos servizos de hemodiálisis extrahospitalaria na comarca de Deza, por un importe de licitación próximo aos 2,8 millóns de euros. O valor estimado, incluíndo ademais as posibles prórrogas de contrato e as posibles modificacións previstas, acada os 5,5 millóns, sinalan desde a Xunta. E é que a duración do contrato será de tres anos, prorrogable ata un máximo de cinco. Con esta medida, o Servizo Galego de Saúde pretende achegar os servizos de hemodiálisis aos pacientes con patoloxía renal dos municipios de Lalín, Silleda, Vila de Cruces, Rodeiro, Agolada e Dozón, que non están trasplantados e que precisan deste tratamento. O obxectivo é lograr unha mellora na súa atención, ao evitar que teñan que desprazarse varios días á semana ata o centro de diálese situado fóra da comarca dezana, en Santiago na práctica totalidade dos casos, cos consecuentes inconvenientes.
7.000 sesións ao ano
O cálculo inicial é que se beneficien desta prestación ao redor de 45 pacientes, cunha media de 13 sesións de diáleses mensuais, o que supón ao redor das 7.000 anuais. A hemodiálisis extrahospitalaria facilitará o servizo cunha maior proximidade, tanto física como temporal, no tratamento aos pacientes e á súa contorna familiar, minimizando os eventuais inconvenientes relacionados cos desprazamentos. O servizo prestarase nun centro situado no municipio de Lalín.
A contratación estará suxeita a regulación harmonizada e realizarase mediante procedemento aberto con tramitación ordinaria. A Xunta lembra que dentro das melloras que está implantando o goberno autonómico no ámbito sanitario na comarca dezana está prevista a construción en Lalín do Centro Integral de Saúde. Segundo o seu plan funcional de espazos, presentado o pasado ano, recolle xa a creación dun centro integral de hemodiálisis que preste servizo á poboación da comarca dezana. Será a localización futura do servizo. Nesta posta en marcha do servizo, o concelleiro de Sanidade lalinense, Nicolás González Casares, apuntara a posibilidade de que se atendese aos pacientes nunha das clínicas privadas de Lalín.
Por outra banda, desde a Xunta lembraron que xunto ao servizo de hemodiálisis extrahospitalaria tamén se incorpora a hospitalización a domicilio (HADO) de forma progresiva na zona, para que en varias fases chegue a abarcar gran parte do municipio de Lalín, así como os termos de Silleda e Dozón, prestando servizo a unha poboación de 35.000 habitantes.