Algúns proxectos parecen nacer gafados. En Lalín lémbranse as mil e unha vicisitudes polas que pasou o aparcadoiro subterráneo que nunca foi tal, e o novo centro de saúde da localidade leva camiño de lembrar as peripecias administrativas que sufriu o aparcadoiro Europa devido en Aldea Grande.
O penúltimo episodio no expediente do Centro Integrado de Saúde é o equívoco na cesión da parcela onde se situará, no alto de Vales. O pleno do pasado 25 de xaneiro aprobaba aquel trámite, remitíndose cinco días despois á Consellería de Sanidade da Xunta de Galicia. Pero desde o Sergas indicábase o pasado día 6 ao Concello a necesidade de rectificar o acordo, xa que se debe facer constar expresamente a cesión dos terreos ao Sergas, e non á Consellería de Sanidade da Xunta de Galicia como se fixo.
Así que a modificación do acordo de cesión da parcela volve hoxe ao pleno. É de agardar que por última vez, despois das comprobacións exhaustivas realizadas desde a secretaría municipal para verificar punto por punto as actuacións que deben realizarse. Nesas comprobacións, contrastouse que o Sergas, como organismo autónomo de carácter administrativo da Xunta de Galicia e con personalidade xurídica propia, é quen asume as cesións para as instalacións sanitarias que se efectúan desde os concellos. Farase hoxe así en Lalín.