O Geas Basket Sesto San Giovanni, próximo rival a bater polo Baxi Ferrol na Eurocup Women
DEPORTES
A FIBA deu vencedor ao Brno do partido suspendido polo apagamento fronte ao Sassari e así queda a próxima eliminatoria
28 nov 2025 . Actualizado á 14:06 h.Fíxose a luz. Polo menos no que a emparellamentos refírese. Despois do apagamento no partido entre o Sassari e o Brno, que gañaban as italianas por dous puntos e que deixou en suspenso os cruzamentos da seguinte rolda da Eurocup Women, a FIBA finalmente deu por perdido o choque ás locais (0-20) por non querer asumir o Sassari os gastos derivados de renovar o choque no día de hoxe.
Deste xeito, as mosqueteiras do Baxi Ferrol mediranse ao Geas Basket Sesto San Giovanni, que se clasificou segundo do grupo D con 3 vitorias e 3 derrotas. San Giovanni sitúase na provincia de Milán e ata alí desprazarase o cadro naval entre o 10 e o 11 de decembro. A volta disputarase na Malata o xoves 18 ás 20.15 horas.
Lino, orgulloso de ser o segundo mellor da fase de grupos
«Ser capaces de acabar a fase invictas, con esa diferenza de puntos e ser segundo na clasificación global, é un orgullo e para apuntalo e telo no recordo» , valorou o preparador do Baxi Ferrol Lino López ao peche deste primeiro asalto europeo. Só o Basket Lattes Montpellier Association de Posipisilová tivo mellores números que as súas.
Tamén tivo palabras para o próximo rival, o GEAS italiano: «É un equipo que vira xogar na fase previa. A liga italiana é unha liga dura e ten experiencia e xogadoras contrastadas e toca gozar de cada partido que disputemos en Eurocup», resolveu.