«Dixéronme que ían buscar a miña dirección para vir partirme as pernas», denuncia a futbolista tras negarse a participar no minuto de silencio en memoria do Pelusa antes do amigable entre o Deportivo Abanca e o Viaxes Interrías
01 dic 2020 . Actualizado ás 13:07 h.Mentres medio mundo vive conmocionado e no medio de homenaxes a Diego Armando Maradona, Paula Dapena decidiu mostrar a súa desconformidade. No minuto de silencio que se gardou onte en memoria do Pelusa antes do amigable entre o Deportivo Abanca e o Viaxes Interrías, equipo de Paula, ela decidiu dar as costas e sentarse no chan. A imaxe correu como a pólvora. «Decateime de que había que facer o minuto de silencio cando iamos no bus ao campo. Nese momento xa dixen que non o ía facer. Xa no campo, o primeiro que se me pasou pola cabeza foi sentarme no chan e dar as costas». Ese xesto revolucionou a todos os seguidores do astro arxentino.
As súas compañeiras mirábana, «elas non crían que fose capaz de facelo e ao final tampouco souberon como reaccionar», lembra. Ata Manu Sánchez, técnico do conxunto branquiazul, achegouse a el no descanso para preguntarlle por que o fixera «e felicitoume polo xesto».
Cando a imaxe do momento fíxose pública, as redes sociais de Dapena comezaron a botar fume en forma de reaccións. Nun principio todo foron mensaxes de apoio e cariño, pero cando a imaxe cruzou o charco e chegou a Arxentina a cousa cambiou. «Duplicáronse as mensaxes de odio e ameazas de morte. Dixéronme que ían buscar a miña dirección para vir partirme as pernas», relata Paula. Pero non só a ela. Tamén as súas amigas e compañeiras de equipo foron obxecto de ameazas.
A futbolista pontevedresa non nega a calidade de Maradona. «Tiña unhas habilidades espectaculares e a poucos futbolistas pódeselles comparar con el, pero persoalmente creo que un deportista ten que ser algo máis que esas habilidades dentro do campo e ter uns principios e valores como persoas, sobre todo se é un ídolo e un referente de moita xente», xustifica.
Aínda que é consciente de que o seu xesto, inocente aínda que reivindicativo, «é normal que non guste a todo o mundo», Paula Dapena considera que non foi irrespectuosa. «Podía ter berrado ou ter parado o minuto de silencio. Simplemente decidín darlle as costas a esa homenaxe. De aí a chegar a ameazarme… é que recibín cousas moi fortes», comenta.
Todo o sucedido nas últimas horas está a facerlle exporse denunciar a todos aqueles que lle lanzaron ameazas. Tanto as súas amigas como as súas compañeiras de equipo puxeron privados os seus perfís en redes sociais para evitar ese tipo de mensaxes. «Estou a exporme denunciar a moitas persoas, pero probablemente sexa moi difícil que cheguen a algo, pero polo menos conseguir que paren». Aínda asi, Paula reivindica o que fixo e non se arrepinte. Conta co apoio da súa contorna e de moita xente que se pon en contacto con ela. «Non é todo malo, tamén hai xente moi amable que me está mandando mensaxes todo o intre», finaliza.
