Veloso, Delio, Marque, Sánchez e Canle inician esta tarde a Grandíssima
27 sep 2020 . Actualizado ás 05:00 h.A punto estivo a pandemia de levar por diante una das carreiras ciclistas con máis soleira do vello continente e a máis querida entre os afeccionados galegos. A empresa xestora da Volta a Portugal anunciaba uns meses atrás a súa decisión de non organizar a edición do 2020 ante o panorama xeral derivado da urxencia e expansión do covid-19. Por fortuna, a Federación Portuguesa de Ciclismo colleu o touro polos cornos, e tras desprazar dous meses a súa tradicional localización no calendario, hoxe a Grandíssima, como se coñece á rolda lusa, bota a rodar cun prólogo de 7 quilómetros en Fafe. Por diante, 1.183,9 quilómetros repartidos entre o prólogo, a contrarreloxo final do 5 de outubro en Lisboa e sete etapas en liña. Dúas xornadas de competición menos, ao que se suma a supresión do tradicional día de descanso e a concentración das dúas grandes citas coa montaña, con final en Señora dá Graça e Torre, na primeira metade do percorrido -etapas 2 e 4, respectivamente-.
A pandemia veu acompañada neste caso con polo menos un efecto secundario positivo para o ciclismo galego. Cinco corredores da comunidade tomarán a saída da Volta, o maior número desde que no 2010 o Xacobeo Galicia disputase por última vez a rolda lusa, no ano da súa liquidación. Co francés Nippo Delko Provence, unha das cinco escuadras foráneas ProTeam que competirán cos oito equipos continentais e unha selección nacional Sub-23 portugueses, acudindo co moañés Delio Fernández.
Delio, que coincidirá cos seus amigos, compañeiros de grupeta e gañadores da Volta no seu entón equipo luso Álex Marque (2013, OFM) e Gustavo César Veloso (2014, OFM, 2015, W52), confesaba onte que, despois de cinco anos sen disputar a Grandíssima, córrea «con ilusión. A min a Volta a Portugal deume moito. Sinto un pouco a proba como se fose portugués. É unha proba moi especial, moi bonita, e non lle ten que envexar a ningunha outra por ambiente». Integrante dun equipo do segundo escalafón mundial, Fernández comenta que «vimos con bastantes carreiras en pouco tempo». No entanto, «o noso obxectivo máis realista é pelexar polas etapas», deixando o favoritismo aos primeiros espadas lusos «sen esquecer a Gustavo».
Veloso e Marque chegan con tan só 5 días de rodaxe tras o confinamento, pero tendo deixado ambos os grandes impresións nos Campionatos de España e no Gran Premio Torres Vedras, díptico disputado a pasada fin de semana. O vilagarcián, terceiro da Volta 2019 tras liderar a primeira parte da carreira e fío condutor da estrutura que gañou as sete últimas xerais, hoxe baixo o manto do W52-F.C. Porto, deberá traballar, comenta, para o último gañador, Joãou Rodrigues, ou Amaro Antunes. Marque, que desde o 2004 só se perdeu a edición do 2014, compartirá liderado no Tavira con Frederico Figueiredo.
Os dous debutantes agardan poder dar guerra e pelexar por gañarse un momento de gloria
Se Marque (38 anos), Veloso (40) e Fernández (34) encarnan a vella garda do ciclismo galego, Anxo Sánchez (Cambados, 27 anos) e Carlos Canle (Ourense, 19) son as súas máis firmes substitucións no horizonte. Ambos debutan na Volta, con idénticos plans.
Sánchez buscou esta tempada no modesto Mortagua luso recuperar a senda do crecemento tras 5 anos taponado entre tanto nome no xigante W52-F.C. Porto. Unha semana atrás mostrouse moi combativo no Torres Vedras e na Volta «teño esperanza de atoparme ben e facer algunha cosita, en clasificacións secundarias ou etapas».
No seu ano 1 de profesional e no ciclismo de estrada, Canle, campión de España júnior de ciclocrós e MTB 2019, declarou onte que o seu equipo, o Burgos, «estame a dar liberdade total, e vou tentar facelo ben nalgunha etapa».