Con 2-2 e no minuto 94, renuncia a un libre indirecto dentro da área por considerar inxusta a decisión do árbitro
16 feb 2020 . Actualizado ás 20:21 h.Poucas veces ocorren cousas como a vivida na mañá deste domingo en Abegondo. O Fabril renunciou a disparar un libre indirecto dentro da área, ao considerar que a decisión do árbitro, o vigués Estremadura Hernández, era inxusta. O partido contra o líder Compostela ía 2-2 e era posiblemente a última xogada do encontro.
Despois dun partido con intercambio de goles, e os visitantes xogando cun menos pola expulsión do exdeportivista Bicho, outro excanterano branquiazul, Sergio Pereira, atopábase tombado no chan queixándose, dentro da área, despois de sufrir un encontrón. Era o minuto 92. O seu porteiro, Pato Guillén, agardou uns segundos para sacar, ata que se levantase o seu compañeiro, pero ante a sorpresa de todos o colexiado sinalou libre indirecto dentro da área por perda de tempo.
Os visitantes reclamaron con insistencia ante o que consideraban unha decisión inxusta e Álvaro Casas viu unha amarela por protestar. O partido estivo parado dous minutos e na continuación, o Fabril renunciou a esta inmellorable ocasión e tirou o balón fóra a propósito, para non aproveitarse do que entendían tamén unha decisión inxusta.
Un xesto moi encomiado por todo o fútbol, xa que ademais o Fabril o realiza a pesar de estar atravesando unha mala serie de resultados que o afastaron do play off de ascenso. O encontro finalizou con ese 2-2 e o filial branquiazul deberá agardar outra oportunidade para reencontrarse coa vitoria.
As reaccións
«Non me gusta falar dos árbitros. Estou a adestrar a nenos e intento ensinarlle que non lle saquen cartón por protestar. Vinme obrigado, antes de ser adestrador, son persoa. Creo que é o máis honesto. Hai cousas máis importantes na vida que gañar», explicou Luisito, o adestrador do Fabril en sala de prensa. «Os futbolistas téñense que axudar. Son excelentes xogadores, con moi bos valores, levan xenial entre eles, pero non me gusta un xesto feo coa man», agregou.
"Hai cousas máis importantes na vida que gañar"
«Antes do libre indirecto, o corpo técnico xa nos avisou de que non ían sacar. E xa llo agradecemos no momento. Intentamos manter a calma en todo momento, pero con esas accións é moi difícil conterse», recoñeceu pola súa banda Yago Iglesias , técnico do Compostela.