Xogadoras e clubs chegan a un acordo para deter os paros, polo menos ata o 20 de decembro
18 novs 2019 . Actualizado ás 19:32 h.Os sindicatos das futbolistas (AFE, UGT e Futbolistas ON) e os clubs chegaron a un acordo á primeira hora da tarde deste luns para detenar a folga do fútbol feminino, que comezou de forma indefinida a pasada fin de semana, e que tivo o respaldo de todas as xogadoras de Primeira Iberdrola, menos unha. Xa que logo, este domingo (12 horas) o Deportivo poderá visitar ao Barcelona no que sin duda será o partido da xornada de Primeira Iberdrola.
Ambas as partes acadaron no SIMA un acordo para desconvocar a folga e dar un prazo dun mes, para que os clubs atopen financiamento para aceptar así as esixencias mínimas das futbolistas (16.000 euros e unha parcialidad do 75 por cento). Con ese diñeiro que aínda non teñen, agardan poder asinar o primeiro convenio colectivo da historia do fútbol feminino. Clubs e xogadoras déronse de prazo ata o 20 de decembro para concretar todos os puntos e ata entonce sno haberá máis paróns.
A pasada fin de semana, as preto de 320 xogadoras de Primeira Iberdrola non acudiron nin a adestrar nin a xogar os seus partidos, apoiando de forma case unánime a decisión tomada hai unhas semanas xunto aos seus sindicatos. Unha decisión que provocou que non houbese xornada de Primeira Iberdrola, ao non xogarse ningún partido dos oito programados. A convocatoria de folga das futbolistas, coa que reclamaban a firma do primeiro convenio colectivo, resultou todo un éxito. Tan só unha futbolista das preto de 320 que compoñen a categoría presentouse a xogar. Foi a realista Maddi Torre: «Non é o momento de facer unha folga. Xa o compartín coas miñas compañeiras e pedinlles respecto porque non é doado estar na minoría», xustificouse na Cadena Ser.
En Abegondo, por exemplo, no Dépor-Logroño, os únicos que foron inscritos na acta foron os corpos técnicos dos dous equipos. O do Logroño viaxou xunto coa súa directiva para deixar claro que non era vontade do club non presentarse ao envite. As estruturas técnicas compartiron asento nunha mesa da cidade deportiva branquiazul, charlando amistosamente ata que a colexiada agardou a media hora que marca o regulamento, para pechar a acta. Agora será o Comité de Competición da federación o que determine que pasará coa xornada suspendida.
David Aganzo, presidente de AFE: "Hai que apuntarlles o tanto ás mozas"
O presidente da AFE, David Aganzo, considerou que a folga que as futbolistas da Primeira Iberdrola realizaron a pasada fin de semana foi clave para que clubs e sindicatos poidan proseguir, a partir deste luns, as negociacións polo primeiro convenio colectivo sobre as bases dun salario mínimo de 16.000 euros brutos anuais e un 75 por cento de parcialidad.
Os sindicatos comprometéronse este luns a retirar a convocatoria de folga indefinida tras unha reunión, de máis de tres horas, mantida cos clubs da Primeira División feminina na sede do Servizo Interconfederal de Mediación e Arbitraxe (SIMA) de Madrid.
Na mesma, a patronal accedeu a acoller a proposta de mediación presentada pola Dirección Xeral de Traballo, que contempla un salario mínimo de 16.000 euros brutos anuais e polo menos un 75 por cento de parcialidad, como esixían as futbolistas.
As dúas partes déronse un prazo dun mes, ata o 20 de decembro, para continuar as conversacións que deben derivar na firma do primeiro convenio colectivo do fútbol feminino español. Con ese compromiso, os sindicatos rexeitan continuar o proceso para a convocatoria dunha folga indefinida tras o primeiro paro, de dous días, protagonizado polas xogadoras.
«Eu creo que ao final estamos buscando un convenio, paso a paso. Esta é unha reunión produtiva e imos intentar, desde a AFE, conseguir ese convenio para as nosas compañeiras. Eu creo que é un día importante (...) e é froito da loita das nosas compañeiras. Dese sacrificio e desa unión están a sacar solucións para que este convenio saia adiante», dixo David Aganzo.
O presidente da AFE, sindicato maioritario na mesa negociadora, explicou que no próximo mes van seguir traballando «no marco do Ministerio de Traballo, que propuxo 16.000 euros (brutos) de salario e un 75 por cento de parcialidad».
«Agora imos intentar chegar a eses puntos restantes para conseguir ese convenio», apuntou o exfutbolista.
Aganzo destacou que o desbloqueo na negociación, despois de 13 meses de conversacións, prodúcese pola postura das xogadoras.
«Hai que apuntarlles o tanto ás mozas», agregou en alusión á folga dos días 16 e 17 de novembro.
«É un traballo de unión, sacrificio e compañeirismo. Elas teñen as cousas moi claras. É un resultado desa folga, positivo para que ese convenio se realice», sinalou.
Alcaine, presidente da asociación de clubs: «A folga e os paróns non lle veñen ben a ninguén»
Nunha reunión de máis de tres horas na sede do Servizo Interconfederal de Mediación e Arbitraxe (SIMA) en Madrid, o presidente da patronal, Rubén Alcaine, explicou que acordaron cos sindicatos «seguir falando» e «intentar chegar a acordos» sobre a recente proposta da Dirección Xeral de Traballo.
Esta garante un salario mínimo de 16.000 euros brutos anuais para unha xornada completa e unha parcialidad mínima do 75 por cento -o que rebaixaría esa cifra a 12.000 euros-. Este último punto converteuse no principal escollo nas negociacións polo primeiro convenio colectivo do fútbol feminino español
Ata o 20 de decembro, segundo explicou Alcaine, os clubs e os sindicatos seguirán conversando, «sen ter a presión» dunha convocatoria de folga e é que AFE, UGT e Futbolistas ON comprometéronse a non convocar un paro indefinido ante a perspectiva de que a patronal acepte esas condicións.
«A folga e os paróns non lle veñen ben a ninguén. Acordamos seguir falando, intentar chegar a acordos e pórnos como data límite o 20 de decembro para ese acordo final, que agardamos que se poida realizar no escenario falado, sen ter esa presión de que se non chega nesta xornada volver falar doutro parón que non beneficia a ninguén», afirmou Alcaine.
O presidente da Asociación de Clubs explicou así mesmo que aceptarán «os 16.000 euros brutos» anuais a xornada completa, que quedarían en «12.000 ao 75 por cento» de parcialidad.
Nos outros puntos que debe conter o convenio colectivo, como a protección en caso de maternidade, de incapacidade ou de lesión, Rubén Alcaine considerou que «non» están «tan lonxe».
«Non creemos que vaia a haber demasiada fricción», abundou.
Alcaine mostrouse igualmente confiado en contar co financiamento necesario, cifrada en 1.500.000 euros, o 20 de decembro, cando podería asinarse este acordo.
Para iso, a Asociación de Clubs propón á Real Federación Española de Fútbol a adhesión ao programa Elite e o consecuente acceso aos fondos federativos.
«Non só desbloquea o tema de financiamento de cara á folga senón moitos problemas de cara aos dereitos audiovisuais de moitos partidos que se están dando e o tema dos soportes propios dos clubs con Iberdrola. A intención é falar esta semana coa federación», sinalou.
