Jacques Villeneuve sobre o regreso de Kubica: «É terrible que un discapacitado estea na F1»
DEPORTES
O campión do mundo en 1997 considera que a Fórmula 1 «non está enviando a mensaxe correcto» permitindo a participación do piloto polaco
25 mares 2019 . Actualizado ás 19:42 h.Xaques Villeneuve, campión do mundo en 1997, criticou con dureza á Fórmula 1 por ter permitido o regreso de Robert Kubica á competición, e deixar así, correr a un piloto «discapacitado». O piloto polaco, que a tempada pasada foi reserva na escuadra de Grove, volveu este ano co equipo Williams, onde obtivo a última praza no Gran Premio de Australia.
Comentarista para a cadea de televisión holandesa Formule 1, Villeneuve considera que «a Fórmula 1 debería ser a cima da competición, de modo que non é bo para o deporte que alguén con discapacidade poida participar nel. O certo é algo terrible». Kubica estivo oito anos fóra da competición oficial tras sufrir un accidente de rali no 2011 que lle causou graves lesións na man e no brazo.
Segundo o piloto canadense «esta categoría debe ser difícil e case inalcanzable para calquera piloto, e co regreso de Robert non mandan a mensaxe correcta». Aínda así cre que Kubica fará todo o posible por manterse ao nivel que esixe a competición, «se fixeches algo que amas e quítancho, traballarás mesmo máis para recuperalo. Se estivese no seu lugar, faría o mesmo. Non debes deixar pasar esa oportunidade», comentou.
A mala relación entre ambos os pilotos naceu hai xa dous anos, cando foron compañeiros de equipo en BMW. Naquel momento, Villeneuve asegurou que Kubica era moi difícil de levar porque a súa actitude se volveu inaguantable. «El era o noso terceiro piloto cando estaba con BMW Sauber e, para ser sincero, era insoportable por aquel entón. Socialmente foi moi complicado», comentou o piloto canadense fai un par de anos.