O técnico do Lugo sacará un equipo competitivo mañá para a Copa sen esquecer que «a Liga é a nosa guerra»
05 dic 2018 . Actualizado ás 13:00 h.Centrado no partido de Copa contra o Levante (Cidade de Valencia, mañá ás 12.00 horas), Alberto Monteagudo recoñece que me gusta sempre focalizar no máis próximo co que implica para ben e para mal», aínda que «evidentemente non podemos esquecernos de que a Liga é a nosa guerra». Non por iso considera a vitoria un contratempo, porque «gañar sempre é bonito, eliminar a un rival de Primeira División é único e poder agardar que che toque un gordo da lotería e vivir unha festa no noso campo é o que quere todo o mundo. Temos un persoal longo e creo que hai fondo de armario para tirar en dúas competicións, non para chegar á final, pero polo menos para intentar unha rolda máis».
O técnico do Lugo agárdase no Cidade de Valencia «un partido diferente» ao da ida: «Creo que eles nos van respectar bastante e a ver se lles pilla a euforia do partido contra o Athletic». Di que no Anxo Carro «fomos súper competitivos, gustoulle moito á xente o equipo e a eles tamén. Falei co presidente, co director deportivo que é amigo meu», comenta por Luis Helguera.
O manchego apunta que os branquivermellos deben tomarllo «no plan de gozalo, de intentar gañalo, de ser moi ambiciosos niso e ver despois se somos capaces de acertar e facer as cousas ben». Agarda que Paco López convoque «a algún dos rápidos que ten ou protagonistas para a última media hora. Teñen dous, tres días para os futbolistas que xogaron contra os de Bilbao que poden xogar. Penso que algún vai levar por se se lle complicase o partido».
Sen Luis Ruiz
Monteagudo tratará de «construír o equipo máis competitivo posible, de xente que está a xogar menos ou que xogou menos sobre todo desde que eu levo aquí e sobre todo con respecto ao último partido de Osasuna. Hai xente que fixo un esforzo moi grande e hai que intentar recuperalos». Será un descarte nese sentido Luis Ruiz que «ten unha pequena distensión do ligamento lateral e pode chegar ao domingo, pero é unha xogada no último momento do sábado, nota unha cousa rara pero remata o adestramento perfectamente e na viaxe, cando baixa do autobús non pode nin andar», explica o técnico que durante o traxecto «se lle inflamó» o xeonllo.
Confía en que os seus poidan prolongar os bos arranques que tiveron noutros partidos e lembraba o lance da ida contra Levante para apuntar que «na segunda parte apertáronnos bastante con Mayoral, pero a sensación que demos é ir de ti a ti contra un equipo de Primeira División, o obxectivo é ese». Nese sentido di que o Lugo adestra «para que os rivais teñan poucas ocasións e facer nós moitas. A partir de aí, conseguir puntos e gañar partidos. Trátase de intentar facer iso e acertar de cara a gol, non só os de arriba: centrais a balón parado, a segunda liña, os bandas, etc.». Tamén fai autocrítica e di que «hai cousas que temos que mellorar, perdemos dous partidos, en Albacete e O Sadar no minuto 80. Temos que vivir eses momentos moito máis duros. Un punto e cero puntos non parece moito, pero empatar no Sadar coa sensación que demos é un mundo».
Non lle gusta demasiado xogar ao mediodía, porque di que che dan unha labazada e vas un pouco atontado, pero bo, faremos os horarios para ir ben e é un partido que che motiva. É un Primeira División, un campo que está moi ben e un partido importante para darnos moral de cara ás Palmas, que é un partido importante para nós». Por iso cre que «a xente ten moitas ganas e faremos un equipo competitivo salga quen saia».
Explica Monteagudo que unha derrota «crea inseguridade en xeral na afección e na xente, pero o Lugo é un equipo profesional e bastante regular no seu xeito de pensar, non é un equipo de altibaixos nin de euforias, nas vitorias e nas derrotas é tranquilo».