Arrinca o curso na NBA cos Warriors como rival a bater e LeBron como gran reclamo
16 oct 2018 . Actualizado ás 05:00 h.Acabáronse os campus, as sesións de fotos e os días da prensa. Acabáronse as xiras por China e as visitas exóticas -é doado gañarse o adxectivo de exótico nun país tan ensimesmado- de equipos estranxeiros desfilando entre malleira e malleira polos pavillóns americanos. Acabáronse as minutadas para os suplentes e para os que apuraban as súas opcións de asinar un contrato. Acabáronse, en definitiva, as probas e con elas o verán que na NBA remata ben entrado o outono. Por fin. Esta madrugada volve o baloncesto e a liga, que vende o espectáculo con mestría, mete a catro dos galos de golpe no curral. Philadelphia e Boston abrirán o pano no Leste. Oklahoma e Golden State, vixente campión, encargaranse de facelo no Oeste.
Será o mesmo de sempre e será totalmente distinto. O de sempre, porque o inimigo seguirá sendo o que era. Unha dinastía -a dos Warriors- coa que todos tratarán de acabar. Pero o larguísimo verán deixou o taboleiro totalmente revolto. Mesmos viláns, mesmos aspirantes, pero distintos exércitos.
O Oeste
Buscando o efecto LeBron. Non é a paciencia unha virtude da afección do equipo máis glamuroso da NBA. Cinco tempadas levan Os Angeles Lakers sen clasificarse para os play off. De longo, a súa época máis escura. Este nivel de tragaderas por parte dos seus afeccionados só foi tolerado ao asumir que estes pos son a indigesta resaca da gran festa das súas vidas. A descomposición dun equipo campión e, por amais de todo, a factura a pagar tras os últimos anos de baloncesto de Kobe Bryant. Era hora de saír do lodo e a maquinaria púxose en marcha desde o mesmo momento no que LeBron James deu o «si, quero».
As inmediacións do Staples Center renden honras ao mito que vén. Xigantescas fachadas que os patrocinadores do xogador hanse encargado de engalanar coa súa cara e as súas novas cores ademais de con as zapatillas ou os auriculares de quenda. «Soñaba con converterse en lenda así que empezou a facer cousas lendarias. Despois decidiu levar os seus soños ao Oeste». Eslóganes mesiánicos para a primeira incursión de LeBron nesta conferencia tras anos dominando a costa Atlántica. O Rey rodeado dunha corte de novas promesas e de veteranos con carisma. Os expertos e as casas de apostas, menos optimistas que os publicistas, auguran aos de púrpura un final de tempada entre o cuarto e quinto lugar na Conferencia Oeste. De momento, máis ruído que noces para os analistas pero nos Angeles non triunfará ningún proxecto que non consiga acaparar antes a luz dos focos.
Por amais deles -e dependendo da proxección- equipos como os Jazz de Ricky Rubio, Oklahoma City Thunder, os Houston Rockets e, por suposto, os Golden State Warriors. Se Steve Kerr afina a DeMarcus Cousins e a saúde acompaña, parece imposible que alguén lles tosa o seu terceiro título consecutivo.
O Leste
Tres aspirantes á sucesión. Comezaron o curso cos deberes feitos pero todo foi un desastre a tempada pasada para Boston Celtics. No primeiro partido do ano pasado, Gordon Hayward, flamante fichaxe, partíase tibia e nocello. Repuxéronse dese golpe e gañaron partidos. En marzo caeu lesionado Kyrie Irving, estrela indiscutible, e seguiron gañando ata finalizar segundos no Leste e acadar as finais de conferencia. Non puideron cos Cavaliers dun LeBron que, in extremis, fixo cumprir o guión doutra final ante os Warriors. Pero este ano será outro cantar. Cleveland será un equipo intranscendente no devir da competición e Boston, xunto a Toronto Raptors e Philadelphia 76ers son os grandes favoritos a reinar no ano I despois de James.
O ano pasado, durante o martirio, os de Boston lograron atopar un camiño entre a desgraza no que Jayson Tatum, un novato, acaudillouse como guía. Pero sobre todo atoparon un estilo da man de Brad Stevens. O quinteto dos de verde asusta. As súas aspiracións dependerán do encaixe de Kawhi Leonard nuns Raptors que lle deron a patada a DeMar DeRozan para facer oco ao talento do ex de San Antonio, que vén dun ano branco tras o seu exercicio de rebeldía fronte a Popovich, e da madurez do proceso dos Sixers. Parece que este é o ano.
Pouco máis á hora de buscar pelexa polo liderado á parte do atractivo de ver aos Bucks de Antetokoumpo. Persiste o problema no Leste que vive o paradoxo de afrontar unha tempada de máis emoción, competitividade e espectáculo á conta de perder ao maior talento visto na Conferencia nos últimos quince anos.
Os españois
A maioría de idade de Gasol. Con 38 anos, Pau Gasol afronta este curso a súa décimo oitava tempada na elite do baloncesto mundial. E as cousas non pintan demasiado ben. A retirada de Ginobilli e a saída de Tony Parker do equipo supoñen o punto e final á época dourada da franquía texana que sempre soubo reinventarse. Movéronse con intelixencia para amortecer a lóxica caída pero a recente lesión de longa duración de Dejounte Murray complica o reto de acceder por vixésimo segunda tempada consecutiva aos play off.
Willy Hernangómez buscará minutos para crecer en Charlotte mentres que Abrines e Juancho Hernangómez tratarán de aproveitar as lesións de Andre Roberson e Michael Porter para convencer os seus técnicos.
Marc Gasol será o estandarte sobre o que os Grizzlies traten de reencontrarse coa súa identidade e Calderón buscará minutos no seu regreso a Detroit.
Ricky, Ibaka e Mirotic serán importantes en equipos de peso e un ex da liga española como Doncic buscará facer presente do seu portentoso futuro.