Sete xogadores diferentes marcaron para o Lugo de Javi López
25 sep 2018 . Actualizado ás 05:00 h.O gol do Lugo non ten unha soa cara. Xa son sete os futbolistas que viron portería para o conxunto que adestra Javi López esta tempada, tantos como dianas. Carlos Pita, Iriome, Campillo, Aburjania, Herrera, Dongou e José Carlos Lazo estreáronse este curso. O extremo cedido polo Xetafe é o único branquivermello que marcou dúas veces para o Anxo Carro en competición oficial: unha en Liga e outra en Copa.
O capitán e o camerunés foron os últimos en atopar efectividade no Lugo. Os seus goles serviron para decantar o partido na Romareda contra o Zaragoza (2-0). «Saíu perfecto, golpeei ben e o Cristian estaba bastante adiantado. Ese gol xa o intentou máis veces», dicía Pita esta semana para La Voz de Galicia polo tanto que conseguiu desde medio campo o sábado. «Gañamos nun campo complicado. Estou contento co gol aínda que máis coa vitoria de todo o equipo», explicaba Dongou. Salvo o seu e o de Cristian Herrera, o resto dos goles chegaron desde a segunda liña. «Estou contento co traballo de todo o equipo, pero con mal sabor de boca polo resultado», recoñecía o canario tras marcar un gol que non servía ao seu equipo para gañar no debut ligueiro contra o Málaga (1-2).
A lista dos homes que viu portería prosegue no centro do campo. Campillo, Aburjania e Iriome fixeron posible a primeira vitoria da tempada con remontada contra o Numancia (3-2). «O primeiro que creu na remontada foi o míster», repartía méritos Iriome tras aquel partido no Anxo Carro, «que nos inxectou unha boa dose de confianza no descanso». «Hai que quedar coa fe que tivo o equipo para levantar o partido», proseguía o canario. A maiores, Juan Muñiz marcou un gol copeiro.
Lazo é o único que ten dobrete en competición oficial. Marcou dous goles importantes para o Lugo esta tempada. Un pasoulles de rolda na Copa no Carlos Belmonte contra o Albacete, o outro axudou ao seu equipo a rascar un punto de vida contra o Granada (1-1). «O míster díxome que fixese o que sei facer. O gol é de todos e o primeiro foi celebralo cos meus compañeiros», comentaba tras o duelo no Novo Os Cármenes.