O vigués Gony Zubizarreta e o brasileiro afincado en Ferrol Vicente Romero gañaron no Xapón a Aloha Cup, proba por substitucións da ISA World Surfing Games
20 sep 2018 . Actualizado ás 19:34 h.A quinta xornada dos ISA World Surfing Games 2018 pasará á historia do surf español. Primeira participación do equipo nacional na Aloha Cup, competición reservada para as oito mellores seleccións do mundial 2017, e primeiro ouro na traxectoria da selección española. E del ten moita culpa Galicia, xa que dúas dos seus principais membros, Gony Zubizarreta e Vicente Romero , viven e adestran nas súas praias, a pesar de ter nacido en Buenos Aires e Brasil, respectivamente.
Coas condicións suficientes para realizar a proba, a primeira semifinal enfrontou a Francia , México, Xapón e Costa Rica, mentres que na segunda competían Portugal, España, Perú e Estados Unidos. Xapón e Costa Rica souberon adaptarse a estas condicións na praia de Long Beach e avanzaron á final. Na segunda semifinal, España conseguiu apear á selección peruana e ao combinado portugués nun intenso duelo.
Xa na batalla final, Costa Rica situouse líder coa que sería a onda máis alta do evento conseguida por Anthony Fillingim (7,5 puntos). Con todo, nos últimos segundos da manga, todos os equipos estaban de volta nas súas carpas a falta de España, quen aínda tiña a Vicente Romero na auga. O deportista hispanobrasileiro logrou pór ao seu equipo no liderado e, tras un último esprint, Romero logrou chegar á meta a tempo evitando así a penalización e asegurando a medalla de ouro para España.
O capitán do equipo español é Gony Zubizarreta, nacido en Burgos Aires en 1985, pero afincado en Vigo desde que era pequeno. «Gañar o ouro é un sentimento incrible», destacou, aínda emocionado polo éxito. «É a primeira medalla de ouro para España e sin duda a ISA Aloha Cup foi a parte máis divertida do evento. Competir contra os mellores equipos, as carreiras, o estrés, fano moi intenso», agregou o galego que ademais foi o mellor europeo da proba individual (sexto).
Vicente Romero , pola súa banda, naceu en Florianápolis en 1992, pero con familia paterna e materna catalá. Mudouse a Galicia no 2013, para adestrar co preparador ferrolán Kako García, con Doniños como epicentro.
No mundo do surf, existe o Campionato Mundial de Surf (World Surf League) que se celebra nun formato parecido á fórmula 1, con sedes repartidas por todo o mundo. Aí están os maiores premios económicos e, polo tanto, os mellores surfeiros do mundo. Logo, a maiores, existe a ISA World Surfing Games, competición federada que está a adquirir un gran auxe xa que a partir da próxima edición os resultados empezarán a computar de cara o debut olímpico do surf en Tokio 2020. A Aloha Cup é unha das súas probas e celébrase por substitucións, con 3 mulleres e 3 homes por equipo nacional.