Xa é o español con máis grandes premios gañados despois dun novo triunfo en Lombardía
18 jun 2018 . Actualizado ás 23:10 h.Suma e segue. A fantástica evolución de Jorge Prado na categoría MX2 de motocrós vai camiño de devorar todas as marcas. O galego, con tan só 16 anos e na súa primeira tempada no campionato do mundo, celebrou a quinta vitoria do ano e sumou o seu oitavo gran premio no Mundial. Desta forma, a incipiente carreira de Prado superou unha nova marca e entra xa na historia do motocrós español como o piloto que máis grandes premios gañou.
En Ottobiano, a máis de 30 graos e cunha enorme humidade provocada polos arrozales que rodean o circuíto, o lucense comportouse durante toda a fin de semana como un veterano corredor. Na primeira manga de onte, Prado fixo o holeshot (chegou o primeiro á primeira curva) e intentou marcharse por diante, pero Covington pegouse a el e a metade de manga superoulle. «Intentei manter unha pequena vantaxe, pero a metade de manga cometín un par de fallos, el pegouse e pasoume. Despois mantívenme tras el, intentando reservar forzas para a segunda manga», comentou logo. Por detrás, Jonass defendíase dos ataques de Watson para rematar terceiro e só ceder dous puntos na xeral sobre Prado.
A segunda manga comezou de novo con outro holeshot de Prado, e van trece. O español saíu primeiro e puxo terra polo medio para evitar que se repetise o episodio da manga inicial: «É a mellor forma de gañar, saír primeiro, tirar forte e que non che sigan, pero hai que estar moi forte para poder facelo», dixo. Jorge rodou sen dar ningunha mostra de fraqueza e gozou do seu baño de champaña no podio e do recorte de sete puntos á vantaxe que Jonass tiña na xeral (agora xa son só nove): «Non hai dúbida de que estamos no bo camiño, recortando puntos cada día e cunha tendencia moi boa. Agardo recuperar ben estes días e chegar a lume de biqueira para seguir así en Indonesia ». O Gran Premio de Lombardía marcou o ecuador dun campionato no que todo está aínda por decidir e con Jorge Prado á alza.