O ourensán Alejandro Pereira triunfa no circuíto de festivais co seu curto «Fuxir»

O cineasta galego Alejandro Pereira Soto, gañador da cuarta edición de Audi Future Stories con Fuxir, continúa consolidándose como unha das voces máis prometedoras do audiovisual español. A súa peza acumula xa 26 seleccións en festivais —tres delas internacionais— e seis premios en apenas un ano de percorrido.

Natural de Ourense e estudante da Escola Universitaria de Artes TAI, Pereira debutou na dirección con este traballo, que xurdiu a partir dun guion propio e que lle permitiu dar forma á súa primeira obra profesional. Fuxir foi rodado en Barcelona e codirigido xunto ao cineasta Kike Maíllo, contando coas interpretacións de Elena Rivera e Álvaro Cervantes.

A cinta destacou pola súa mestura de drama, tensión emocional e elementos fantásticos, construíndo a historia dun artista atrapado na obsesión pola súa propia obra e decidido a escapar dunha vida que xa non recoñece. A súa proposta estética e o seu pulso narrativo chamaron a atención do circuíto.

Ao longo do último ano, Fuxir foi seleccionado en 26 festivais, 3 deles internacionais, e recibiu un total de 6 galardóns, que comprenden: o Premio ao Mellor Guion no 4.º Certame de Curtametraxes de Tres Cantos (Madrid), o Premio Kinova á Mellor Fotografía na 46.ª Semana Internacional da Curtametraxe de San Roque (Cádiz), a Mención Especial pola súa Calidade Artística no 3.º Festival de Cine de Sorihuela del Guadalimar (Xaén), o Premio ao Mellor Actor para Álvaro Cervantes no 10.º Festival Internacional de Curtametraxes Galapán (Xaén), a Venus de Badalona ao Mellor Actor para Álvaro Cervantes no 51.º FILMETS Badalona Film Festival (Barcelona) e Premio á Mellor Curtametraxe no Festival Isla Calavera celebrado nA Lagoa (Tenerife).

---

---