O festival, que terá lugar do 15 ao 17 de xuño en Santiago, contará tamén coa presenza de Alt-J, The Kooks, Royal Blood, Steve Angello, Leiva e Vetusta Morla
29 may 2023 . Actualizado ás 18:26 h.Tres das figuras máis exitosas do pop cantado en castelán actual coroan o cartel do Son do Camiño 2023. En primeiro lugar, Aitana, a superestrella española que arrasa nas listas de vendas. Participará no festival nunha das escasas citas deste estilo que contará con ela no verán. Xunto a ela, Maluma, estandarte do reguetón comercial e fenómeno musical que o ano pasado reuniu a 20.000 persoas no Estadio de Riazor da Coruña. Bizarrap, o produtor e DJ que moldeou os últimos superéxitos de Quevedo e Shakira, completa o trío de apostas da organización do evento de pagamento máis importante dos que se celebran en Galicia. Terá lugar entre o 15 e 17 de xuño no auditorio do Monte do Gozo de Santiago.
Confírmase así o xiro cara ao latino xa apuntado na edición do 2022, dándolle un protagonismo especial a este tipo de artistas que figuran coas letras máis grandes do cartel. Este feito confírmano outros nomes que inciden nesa liña. É o caso de Trono , o rapeiro arxentino que xa fixo actuacións o ano pasado na programación do Xacobeo, igual que Duki, que repite tras o seu éxito da edición precedente. Tamén de Tokischa , a cantante dominicana que colaborou con J Balvin, Rosalía, Madonna, Anuel AA e Ozuna. Neste apartado atópase Eladio Carrión, símbolo intergeneracional da ponte entre o reguetón e o trap latino.
Nunha esfera diferente, pero dentro do pop-rock mainstream nacional, aparece Leiva, claro aspirante a repetir unha estampa de comuñón co público como a ocorrida o ano pasado con Dani Martín. E Vetusta Morla, cuxa dimensión xa hai tempo que transcendeu os límites naturais da música independente, e que volverá ao Son do Camiño.
Indie e rock de procedencia anglosaxoa
No entanto, o festival tamén incluíu nomes que se asintan noutro dos paus tradicionais do evento, o indie e o rock anglosaxón. Aínda que teñan perdido peso no global respecto das primeiras edicións e non se atopen nos primeiros lugares do cartel, aparecen nomes como Alt-J, The Kooks e Kaiser Chiefs, habituais nos eventos de corte indie. E tamén roqueros de peso como os australianos Wolfmother e Royal Blood, que debutan así en Galicia.
No terreo da música de baile mírase ao norte de Europa. Por unha banda, comparecerá o produtor sueco Steve Angello, integrante de Swedish House Mafia, un dos maiores referentes mundiais da música electrónica. Por outro, Morten chega desde Dinamarca. O relativo ao baile figura A festa máis linda do mundo, Bresh, un concepto que funciona a nivel internacional e que ocupa lugares destacados nos festivais de medio mundo.
O cartel remátao unha ampla listaxe de artistas nacionais, entre os cales se atopan moitos nomes galegos. Trátase de Xoel López, Viva Suecia, Nervo, Marlon, Xenebras, Delaporte, Nena Polaca, Mavica, Dani, Moza Sobresalto, Anaju, Nano, Sila Lua, Maryland, The Rapants, Babykatze, Fraca, Groove Amigos, Michenlo, Toccororo, Fillas de Cassandra, Alexandre Som, Galician Army, Mozo Blanco , Karras Martínez, Yung Prado, Bárbara Lago, Bastian Bux, Fer BR, Mëstiza e Thom Archi.
Entradas á venda mañá
O festival O Son do Camiño vendeu xa 33.000 abonos en Nadal sen anunciar nin un só artista do cartel. Mañá venres 31 poderanse á venda os últimos abonos dispoñibles. A venda empezará ás 12.30 horas. Nos próximos días tamén se poderán adquirir un número limitado de entradas soltas para cada xornada.