A Fundación Columbus celebra tres concertos benéficos en Santiago, Ourense e Pontevedra
CULTURA
Ramón Tebar dirixirá un programa co «Stabat Mater» de Pergolesi e arias e dúos de Bach, Händel e Scarlatti
21 oct 2021 . Actualizado ás 05:00 h.A Fundación Columbus marcouse como obxectivo contribuír ao desenvolvemento de tratamentos efectivos de terapia génica para tratar dez enfermidades raras nun prazo de dez anos. Trátase dunha terapia que busca substituír o xene causante da enfermidade por un san, agregar aos xenes que poden tratar a enfermidade e desactivar aqueles que causan problemas. Un bo exemplo é o caso de Irai, a primeira paciente española tratada con terapia génica no 2019 para abordar a AADC ou párkinson infantil. De non poder usar as extremidades agora contrólaas e empeza a camiñar, é capaz de soster a cabeza cando antes non era capaz de mantela ergueita e os seus progresos son notables.
Xa non quedan casos de párkinson infantil en España, pero si un centenar no mundo. Son necesarios 70.000 euros para mellorar a calidade de vida dun neno e a Fundación Columbus quere contribuír a cambiar decisivamente as de Meir e Yehudit. Ambos son irmáns e os seus pais teñen que dedicarlles atención continua, polo que non poden traballar. Deben ser alimentados as 24 horas do día con sondas e necesitan fisioterapia.
A fundación utiliza a música como medio para difundir as súas causas e tamén como unha ferramenta para reunir os fondos necesarios que contribúan ao tratamento. A celebración do ano xacobeo é o escenario ideal para a organización de tres concertos en Galicia en enclaves privilexiados e que teñen como obxectivo o tratamento de Meir e Yehudit: serán o día 26 na catedral de Ourense, o 27 na basílica de Santa María a Maior de Pontevedra e o día 30 na catedral de Santiago; os recitais comezarán ás 21.00 horas e terán unha duración aproximada dunha hora e vinte minutos.
No programa, algunhas das cimas da música clásica: o Stabat Mater de Pergolesi, así como arias e dúos de Bach, Händel e Scarlatti. En conxunto, representan a dor e a esperanza, conceptos transversais ao concerto e ao seu propósito. O programa será executado pola Orquestra de Cámara de Múnic, baixo a dirección de Ramón Tebar, que contará con dous solistas, a mezzosoprano Tara Erraught e a soprano Auxiliadora Toledano.