A trama expón unha intriga de espionaxe na véspera da Gran Guerra
26 jun 2021 . Actualizado ás 05:00 h.Millóns de libros vendidos —calcúlase que superan os 160 millóns en todo o mundo— avalan a carreira do escritor galés Ken Follett (Cardiff, 1949). Un éxito que se pode reducir unicamente a unha soa fórmula: a súa capacidade para crear personaxes e urdir tramas tan adictivas que é imposible deixar a lectura das súas novelas. Ese é o denominador común nas historias dun autor que se move con igual soltura na Idade Media que no século XX, que tanto toca a construción de catedrais como o roubo dun virus ou o traballo encuberto dos axentes en ambas as guerras mundiais.
O home de San Petersburgo sitúase precisamente na véspera da Gran Guerra, nun tenso contexto prebélico no que as grandes potencias despregaban os seus recursos militares e de intelixencia para tecer alianzas e pactos secretos. Trátase dunha as novelas de espionaxe máis logradas de Follett, e que La Voz de Galicia ofrece este domingo aos seus lectores por 5,95 euros máis o importe do xornal, dentro da súa colección de intriga histórica. Os subscritores poderán beneficiarse dun desconto do 30 %.
O sobriño do tsar
En 1914 Inglaterra manobra para acadar un acordo con Rusia que incline a balanza ao seu favor fronte a Alemaña nunha guerra máis que previsible. O tsar Nicolás envía ao seu sobriño Alexei Orlov a Londres para participar nunha serie de conversacións bilaterais que disporán o taboleiro estratéxico das grandes potencias. Follett concreta este argumento histórico en personaxes de carne e óso, a través dos cales viches as intrigas e paixóns que fan do home de San Petersburgo unha lectura vibrante. Orlov trata co novo lord Walden, cuxa muller, Lydia, é rusa.
Non son os únicos relacionados co enviado do tsar: tamén Feliks, un anarquista, é consciente da súa presenza e decide atentar contra a súa vida. Pero entre este grupo de personaxes non só aparecen motivacións políticas, senón que os vínculos sentimentais que os unen inflúen poderosamente nas súas decisións e accións, que ademais resultarán decisivas para o futuro desenvolvemento do que se denominará a Primeira Guerra Mundial.
Follett é recoñecido pola minuciosidade coa que documenta e concibe os seus argumentos. Nas súas notas para O home de San Petersburgo partiu con algunhas ideas soltas: anarquista ruso, bomba de nitroglicerina, un incidente no palacio. Con estas vimbias, o novelista foi construíndo unha historia que dosifica maxistralmente o suspense dunha trama de espionaxe, pero á que tamén engade xiros inesperados como revelacións familiares e antigas relacións amorosas.
Di moito de Follett e como traballa os seus libros o feito de que se documentou a fondo para escribir a escena na que o seu anarquista mestura os ingredientes necesarios para elaborar unha bomba, pondo en perigo a súa vida, só para eliminar algúns detalles cruciais cando caeu na conta da posibilidade de que un lector imprudente ou inconsciente puidese seguir as súas instrucións ao pé da letra e fabricar o seu propio explosivo.
Domingo 4 de xullo
«O sangue dos inocentes», unha viaxe por tres épocas separadas por séculos da man de Julia Navarro
«Son espía e teño medo». Así arrinca O sangue dos inocentes, unha novela de Julia Navarro que leva ao lector nunha viaxe a través dos séculos, do XIII a 1939 e de aí ao mundo contemporáneo. Roma, Selecta, Xerusalén e Berlín son algunhas das cidades polas que a escritora conduce esta trama que pode e debe lerse como unha alegación contra o fanatismo relixioso. As loitas de poder entre cátaros e católicos, un medievalista que emprende a procura da súa muller de orixe xudía na Alemaña nazi e un grupo de musulmáns que se inmola en Frankfurt son algúns dos argumentos deste thriller histórico de narración trepidante e adictiva.