A crise do covid-19 abre a porta aos concertos en «streaming» de pagamento
CULTURA
A Ponte de Santiago realizou varios con éxito, e en Madrid promóveos xa a sala Moby Dick
29 may 2020 . Actualizado ás 05:00 h.Na crise sempre hai ocos para as oportunidades. No mundo da música en vivo, totalmente paralizado polas restricións sanitarias do coronavirus, xurdiu algo do que se falaba desde hai anos sen moito convencemento: os directos en streaming de pagamento. «Eu son técnico de son, teño un estudio de gravación e no verán traballo facendo concertos con artistas como Xabier Díaz, Terbutalina e Caxade. Ante a imposibilidade de tocar xurdiu isto», explica Tomás Ageitos. A percepción cambiou totalmente: «Visto o resultado penso que pode ser algo que conviva cos concertos presenciais», di.
Ageitos rexenta os estudos A Ponte, en Santiago. Agora, ademais de gravar un disco, alí pódense dar concertos para que o público os vexa na súa casa. Trátase da Ponte dous Concertos, actuacións que se retransmiten en streaming e que logo non se soben a ningunha plataforma. Pasaron xa Paco Nogueiras e o mandolinista Fernando Barroso con notable éxito. «No caso de Fernando Barroso esgotáronse as entradas», indica. No reconto descubriron unha sorpresa: o público repartíase por países como Portugal, a India, Francia ou Estados Unidos. «Os artistas minoritarios pero globais venden máis entradas así ca nun concerto normal», indica.
A aventura galega non é illada. Unha das salas lendarias de Madrid, a Moby Dick, lanzouse tamén cun ciclo xunto á plataforma Dixital Fep, que ofrece este tipo de servizos. Esta noite actúan no seu escenario Indigo Drone (22 horas, 3 euros), e mañá Os Punsetes (22 horas, 8 euros). Farano coa sala baleira. O público? Estará tras as pantallas, desde os lugares máis recónditos. Germán Ormaechea, fundador da empresa, comenta esa ruptura de barreiras: «Os Punsetes ían ir de xira a México e tiveron que suspendela polas restricións. Agora están comprando as entradas os fans desde alí».
O impulsor desta empresa cre que o formato vai permanecer, máis aló da crise actual: «As salas non van poder usar o mesmo capacidade, e poderán convivir os dous tipos de público. Un presencial e outro en casa», apunta. Para os da opción doméstica deseñaron todo tipo de detalles: desde unha zona vip, que dá dereito a interactuar coa banda desde o seu camerino, aos convenios con marcas de bebida para facer packs que se servirían a domicilio durante o concerto. Pero, ademais, este emprendedor, que procede do mundo da música, acode a outra forza: «Este é o momento de apelar á xente a que apoie á cultura, e non simplemente dicir que a música se está morrendo. En Moby Dick sacaron ao seu técnico de son do ERTE. Este é o momento de estar aí».
En Santiago, Tomás Ageitos tamén ve infinitas posibilidades nun formato como o seu. Garante unha excelente calidade de son, ao facerse nun estudo. E pode abrirse camiño neses casos nos que a preguiza ou as molestias dun desprazamento deixan moitas entradas sen vender. «Pasou no concerto de Paco Nogueiras. Tratábase de música infantil. No chat dicía a xente que preferían velo na súa casa que ter que trasladar aos nenos en coche ao lugar onde se celebraba», explica.
Na axenda da Ponte xa aparecen Bravo & Morales Dúo (12 de xuño) e Candorka Trío (18 de xuño). Manexan moitos outros máis, que se anunciarán en breve.
The Posies, en aberto
Ademais destas iniciativas, o ciclo SON Estrella Galicia segue apostando polo streaming en aberto. Mañá (13.00 horas nas plataformas da marca) acollerán unha actuación de The Posies , que ían vir de xira a España en xuño. Presentarán dous temas inéditos e versionarán temas de Big Star.