A mostra de Chagall poderá visitarse ata o 28 de xuño
25 may 2020 . Actualizado ás 12:34 h.A Fundación Barrié reabrirá ao público este martes as súas salas de exposicións. Os horarios serán de 11.00 a 14.00 e de 17.00 a 20.00 horas. De forma excepcional, tamén abrirán os luns. Será necesario adoptar medidas de seguridade e hixiene para a prevención de contagios. Entre elas figuran o uso obrigatorio de máscara en todo o recinto e a desinfección de mans á entrada do edificio. Tamén haberá que manter unha distancia de dous metros entre persoas e o uso de ascensores será individual. A capacidade de acceso ás exposicións redúcese a un terzo da súa capacidade.
O público poderá, desta forma, volver gozar da mostra que a Barrié tiña aberta cando se iniciou o confinamento. Trátase de Marc Chagall. Fábulas e soños, centrada na obra gráfica do artista. Son máis dun centenar de obras divididas en catro series, que abarcan o período comprendido entre 1927 e 1968, polo que permite apreciar a evolución da súa traxectoria artística e o seu dominio das técnicas de gravado.
Ademais, a Barrié conta con outras dúas salas, con exposicións permanentes. Unha delas percorre a carreira de Francisco Llorens, mentres que a outra alberga a colección de arte contemporánea internacional da entidade.