O xurado destaca a súa capacidade para desbordar «coa súa incesante creatividade o límite que propoñen os xéneros literarios»
01 may 2020 . Actualizado ás 13:25 h.O escritor holandés Cees Nooteboom, poeta, novelista, ensaísta e crítico de arte, foi galardoado co Premio Formentor das Letras 2020 por desbordar «coa súa incesante creatividade o límite que propoñen os xéneros literarios», segundo o fallo do xurado feito público este mércores. Os membros do xurado do Premio Formentor das Letras 2020, formado por Judith Thurman, Alberto Manguel, José Enrique Ruiz Doménec, Alexis Grohmann e o seu presidente Basilio Baltasar, tiñan previsto reunirse na sede da Fundación Saramago de Lisboa, pero ante a imposibilidade de desprazarse han deliberado desde os seus respectivos lugares de residencia: Manhattan, Barcelona, Edimburgo e Mallorca.
Para o xurado, o galardoado co Premio Formentor 2020 «éou n escritor viaxeiro que fixo do nomadismo unha actitude filosófica, estética e espiritual que transcende as fronteiras e revela a natureza expansiva dos horizontes humanos», segundo recolle Efe. Nooteboom «é un escritor universal que escribe coa conciencia de pertencer á gran tradición cultural europea. Viviu de preto os espectaculares momentos da historia do noso continente e contemplouno de lonxe: coñece moi ben os dilemas que Europa debe resolver. A súa obra é o resultado dunha indagación penetrante nese espírito que nunca nos fixo tanta falta como hoxe», asegura a Fundación Premio Formentor.
Cees Nooteboom (A Haia, 1933) é un dos maiores e máis orixinais escritores holandeses contemporáneos: tradutor de poesía española, catalá, francesa, alemá e de teatro americano; autor de novelas, poesía, ensaios e libros de viaxe. A súa obra foi traducida a máis de vinte idiomas. Na acta da reunión o xurado destaca como «a súa mirada minuciosa revela o sentido dun mundo en perpetúa transformación e a súa curiosidade non deixa lugar algún libre da inquietude creativa que o levou dun lugar a outro desde os comezos da súa fértil traxectoria literaria». Na súa opinión, Nooteboom «deu á ficción a certeza dunha presenza persoal e ao relato existencial das súas viaxes a delicadeza narrativa da gran literatura. É un dos máis grandes cronistas do noso tempo, capaz de converter as experiencias das súas viaxes nunha sabia percepción dos elementos latentes do cosmopolitismo estoico». Entre as súas obras figura O desvío a Santiago, sobre o Camiño xacobeo.
O holandés obtivo, entre outros recoñecementos, o Premio Europeo Aristeon de Literatura (1993) pola historia seguinte, o Premio Bordewijk (1981), o Premio Pegasus de Literatura (1982), a Medalla de Ouro do Círculo de Belas Artes de Madrid (2003), o Premio Europeo de Poesía (2008), o Premio de Literatura Neerlandesa (2009) e o maior premio que se concede na literatura de viaxes, o Premio Chatwin (2010). En Francia foi nomeado Caballero da Lexión de Honra e é Doutor Honoris Causa pola Freie Universität de Berlín. Vive entre Holanda, España e Alemaña e na súa bibliografía destaca o importante papel que xogou a illa de Menorca nalgúns dos seus libros.
O Premio Formentor, que recoñece «a calidade e integridade dos autores cuxa obra consolida o prestixio e a influencia da gran literatura», é un galardón sostido co mecenado das familias Barceló e Buadas, concedido por primeira vez en 1961, foi impulsado por un reputado grupo de editores europeos (Carlos Barral, Gallimard, Einaudi, Rowolt…). En Formentor foron premiados, entre outros, Jorge Luis Borges, Samuel Becket, Saul Bellow, Jorge Semprún e Witold Gombrowicz. Tras a súa recuperación, o premio hano recibido Carlos Fuentes , Juan Goytisolo, Javier Marías, Enrique Vila-Matas, Ricardo Piglia, Roberto Calasso, Alberto Manguel, Mircea Cartarescu e Annie Ernaux. A Fundación Formentor foi creada para organizar o Premio Formentor das Letras e as Conversacións Literarias que se celebran cada ano en Formentor.