Foi autor das carátulas de álbums famosos como «Help!» e «A hard day's night»
09 novs 2019 . Actualizado ás 21:45 h.Os exBeatles Paul McCartney e Ringo Starr renderon tributo ao fotógrafo londiniense Robert Freeman, autor das portadas dalgúns dos álbums máis emblemáticos da banda, que faleceu este xoves aos 82 anos.
No seu blogue oficial, McCartney di que Freeman, cuxa morte anunciou o venres o Twitter oficial dos Beatles, era «un dos fotógrafos favoritos» do cuarteto, non só «un gran profesional» senón tamén «imaxinativo e un orixinal pensador».
«Botarei de menos a este home marabilloso pero sempre apreciarei os cariñosos recordos que gardo», afirma o músico.
En Twitter, Starr tamén lembrou ao artista: «Deus bendiga a Robert Freeman, paz e amor a toda a súa familia», escribiu.
Ao informar o falecemento, a conta dos Beatles destacou que Freeman creou «algunhas das máis icónicas imaxes da banda», que protagonizaron álbums como With the Beatles, A hard day's night, Beatles for sae, Help! e Rubber Soul.
Nacido en Londres o 5 de decembro de 1936, Freeman deuse a coñecer como fotógrafo do xornal británico The Sunday Times e a través das súas fotografías en branco e negro de músicos de jazz , entre eles John Coltrane.
Foron estas fotos as que chamaron a atención do xestor dos Beatles, Brian Epstein, e dos propios compoñentes da banda de Liverpool (noroeste de Inglaterra ), que empezou a fotografar en 1963.
Ese mesmo ano, Freeman fotografou tamén o primeiro calendario Pirelli de mozas espidas, que apareceu en 1964.