«Xubilación e dereitos de autor deben ser aquí como noutros países europeos»
CULTURA
Jorge Corrales dirixe o Centro Español de Dereitos Reprográficos, unha entidade que «axuda a autores, xornalistas e profesores que viven unha situación complicada»
15 mares 2018 . Actualizado ás 07:43 h.«O noso principal obxectivo é axudar aos autores. Pídennos unha axuda asistencial moitas veces quen empezan, ou quen non obteñen ingresos que lles permitan vivir holgadamente. Non só recadamos e repartimos, no ano 2017 demos máis de mil axudas, sobre todo a autores, xornalistas e profesores que viven nunha situación complicada», explica Jorge Corrales , director xeral do Centro Español de Dereitos Reprográficos (Cedro). Representan a «24.392 escritores, tradutores, xornalistas e editoriais en España, e en Galicia temos domiciliados sobre 1.050 autores e 70 editores» Onte explicou en Santiago os cambios lexislativos polos que traballan. .
-Como axudan aos autores?
-Un traballador social elabora os expedientes. Apróbanse axudas oculares ou tratamentos odontológicos. Ademais, ofrecemos servizos como intervir en casos de piratería, resolver dúbidas sobre dereitos de autor, e investimos tamén en formación.
-Como financian esas axudas?
-A través dos dereitos de xestión colectiva obrigatoria, co que recadamos pola copia privada ou o préstamo público, 11,5 millóns de euros no 2017.
-De onde proceden eses recursos?
-Un convenio coa CRUE [Conferencia de Reitores de Universidades Españolas] achéganos 3 millóns de euros; 1,5 millóns o canon por copia privada; recadamos 700.000 euros de convenios con entidades análogas do estranxeiro, de Europa, América ou Xapón; uns 120.000 euros por préstamos en bibliotecas; e o resto por licenzas, a través dunha rede de axentes que visitan empresas, academias e outros usuarios que reproducen contidos dos nosos membros para os que necesitan autorización.
«No 2017 demos máis de mil axudas a autores, xornalistas e profesores que vivían un momento difícil»
-Como explica esa cantidade por préstamos en bibliotecas?
-Ese é o principal problema das catro situacións que entendemos profundamente graves en España para o noso colectivo e nas que traballamos para que se produzan cambios lexislativos. A lexislación española recoñece os dereitos de autor por préstamo público, pero ninguén parece estar obrigado ao pagamento, ou nunha porcentaxe moi pequena, pois pagan menos do 10 %. Por iso pedimos que se axuste a lei para que se cumpra, porque prexudica sobre todo aos autores de libros, e tamén a xornalistas.
-Que outros cambios lexislativos se propoñen?
-Que se recoñeza a compatibilidade do cobro da pensión de xubilación cos dereitos de autor, deben ser aquí como noutros países europeos, como Italia, Francia ou Alemaña. Hai autores que deixaron de crear por iso, mesmo que se suicidaron, por iso hai que modificalo; porque ás veces o éxito dunha obra pode ocorrer 30 anos despois de publicarse, por situacións por exemplo unha adaptación audiovisual. A morte de Forges, ou algún recoñecido autor que ten dificultades para viaxar e continuar a súa obra, puxeron o tema recentemente de actualidade. Tamén buscamos o uso de contidos protexidos en contornas como empresas ou administracións de xeito sostible, que non se prexudique a autores que crean eses contidos; e máis avances contra a piratería.