Esta directora galega presenta a longametraxe «Trinta Lumes», onde se plasma a súa persoal visión do Courel
15 feb 2018 . Actualizado ás 18:30 h.Comeza hoxe esta 68.ª Berlinale como unha fiestra aberta á internacionalización dunha directora galega, Diana Toucedo, e o seu debut excelente no longo con poderosa Trinta lumes, exploración dun territorio, O Courel, ao que a súa mirada personalísima confire aires ou lumes fatuos como transposición dese limes de convivencia cos mortos que parece inxectado -desde a particularidade intrínseca desa cosmogonía galaica- polos ecos de Juan Rulfo ou mesmo de Joyce. Móstrase na sección Panorama como foco inmellorable de presentación para Toucedo, cunha asentada traxectoria como montadora e como asinante dalgúns curtos que xa anunciaban autora de visión fecunda.
Xunto a ela, o cine español contará con presenza dobre: outra directora, a catalá, Meritxell Colell estrea Co vento. E o protagonismo de Barbara Lennie apodérase da enfermidade do domingo, de Ramón Salazar. Na sección oficial, en loita polo Oso de Ouro, dous autores norteamericanos de ambicións que xogan por fóra do Hollywood ramplón: Gus Van Sant, cuxo filme protagoniza un Joaquin Phoenix onfire , que vén de triunfar en Cannes. E Wes Anderson coa súa nova obra de animación Isle of Dogs, onde poñen voz desde Greta Gerwig ou Bill Murray a Yoko Ono. Steven Soderbergh presentará o seu moi agardada cinta de terror Unsane, con Claire Foy e Juno Amorne. E o brasileiro Jose Padilha, responsable de Narcos e gañador xa dun Oso de Ouro por Tropa de elite, estrea 7 days inEntebbe , sobre un famoso secuestro aéreo.
A nómina dos aspirantes aos premios é todo un gotha de autores inclaudicables, dos que tampouco deixan reféns: é o caso do filipino Lav Díaz, experto en presentar obras de oito horas que supoñen case secuestros por un día e que xeran síndrome de Estocolmo nos críticos que saen afirmando que os últimos 30 minutos son maxistrais (o seu filme deste ano, unha ópera rock, só dura 4 horas: humanizouse Díaz), do alemán Christian Petzold, tan agardado despois da súa obra mestra Phoenix, ou do ruso Alexei German. Benoit Jaquot repite con Isabelle Huppert en Eva . E iso sen esquecer a troika de popes asiáticos, Hong Sang-soo, Kiyoshi Kurosawa e o artista antes coñecido como Kim-Ki duk.