Facilita o contacto entre empresas, emprendedores e demandantes de traballo
23 may 2019 . Actualizado ás 10:48 h.Sada puxo en marcha un portal de emprego propio para facilitar aos veciños que buscan un traballo poder acceder ás ofertas que se realicen tanto desde as empresas do municipio como de toda Galicia e supón a xestión integral da bolsa de emprego tanto para demandantes dunha ocupación, como empresas ou autónomos que desexan incorporar persoal ao seu persoal.
Esta ferramenta, que se impulsa desde a Axencia de Emprego e Desenvolvemento Local (AEDL), ponse en marcha para facilitar unha redución do número de desempregados no municipio, que no mes de abril ascendían a 940 persoas.
Desde www.aedlsada.gal os candidatos poden inscribirse como demandantes de emprego, xestionar o seu currículo, editalo e imprimilo, estar ao tanto das ofertas da zona e atopar as publicadas polas empresas que se rexistraron no portal. Permite enviar o currículo ás ofertas que interesen e recibir, ademais, as noticias máis importantes sobre emprego e formación ocupacional do Concello. Os desempregados tamén poden realizar a inscrición, se lles resulta máis cómodo, nas oficina de colocación.
No caso dos negocios, desde a AEDL remitiranse ao correo unha preselección cos currículos das persoas demandantes de emprego que queren inscribirse na oferta que realicen e cumpran uns requisitos mínimos, o que permitirá que se consulten e faciliten a selección. Ademais, contan cun apartado para describir a súa actividade e servizos.
O portal inclúe a base de datos de empresas do Concello de Sada o que facilita coñecer o tecido empresarial. Tamén se expón como un apoio ao emprendimiento empresarial e autónomo sendo punto de encontro do Concello co cidadán e os negocios.
Este novo portal de emprego que Sada puxo en marcha onte é accesible desde calquera dispositivo xa que ten web adaptativa propia, así como ligazón desde a web municipal e nos próximos días contará cunha aplicación (Android e iOs) que se poderá descargar nos distintos smartphones e onde se ofrecerá a posibilidade de notificacións e alertas de noticias ofertas aos veciños inscritos.