Oleiros esixe ao Goberno central que asuma o recheo na praia do porto de Santa Cruz

O alcalde de Oleiros , Ángel García Seoane, mantivo esta semana unha reunión telemática co subdirector xeral para a Protección do Mar, Anxo Muñoz Cubillo. O obxectivo era solicitar que o Ministerio se ocupe da rexeneración da praia do porto de Santa Cruz, «que precisa dunha achega de area entre a pasarela de acceso ao castelo e o porto». Segundo apuntou o rexedor, Muñoz Cubillo comprometeuse a estudar o proxecto necesario para intentar realizar esta actuación que, ademais, evitaría máis danos na estrutura do paseo marítimo ante a actual desprotección que sofre.

O alcalde tamén expuxo a grave situación que se está producindo no Xunqueiro, na localidade de Mera, que xa foi comunicada á Fiscalía e que, desde o Concello, aseguran que necesitará dun mínimo investimento da Demarcación de Costas. Neste caso, o subdirector xeral tamén se comprometeu a estudar o problema existente. «É unha competencia da súa titularidade que precisa dunha actuación urxente para evitar novos desprendementos que poidan afectar á estrada», sinalan desde o Concello de Oleiros. A praia do Xunqueiro estivo cortada este verán por varias rocas de grandes dimensións.

---

---

---