Fomento anunciou ao Concello a inminente colocación dos elevadores para abrir os accesos canto antes
11 oct 2019 . Actualizado ás 11:29 h.Ao Goberno local de Oleiros comunicáronlle que os catro ascensores das pasarelas da N-VI en Perillo comezarán a instalarse a próxima semana. «Así o dixo Fomento», explican fontes municipais. Deste xeito, daríase o último paso para pór en funcionamento os accesos peonís que xa estaban prometidos para o mes de setembro.
Durante estes días, os operarios están acristalando a instalación e realizando o pintado final, antes da colocación das estruturas, na que están a utilizar pequenos guindastres que flanquean a estrada de dobre vía. Varios veciños queixáronse esta semana da tardanza sobre os prazos anunciados, especialmente para as persoas con mobilidade reducida.
De cumprirse o prazo da instalación, o Concello xa só estaría pendente dos prazos administrativos que marque o Ministerio de Fomento, promotor da obra ao ser o titular da vía sobre a que se realiza. O custo é dun millón de euros e o teórico prazo de execución, de oito meses, que xa se pasaron. A instalación das pasarelas, cuxa parte horizontal se colocou nunha madrugada de agosto deste ano e que obrigou a desviar o tráfico neste tramo, corre a cargo da UTE formada por Emesa e Francisco Gómez e Cía, aínda que a primeira non realizou per se a súa parte senón que o encargou a outra firma.
Unha vez que o Concello recepcione a obra, farase responsable do mantemento das dúas pasarelas.