Os veciños da urbanización advirten do perigo potencial que entraña
18 feb 2019 . Actualizado ás 16:46 h.A instalación de dúas torres de iluminación no campo de fútbol dos Regos mantén en albas desde a semana pasada aos veciños dos chalés máis próximos ao recinto deportivo, que advirten do perigo potencial que entraña para a seguridade das súas vivendas, estética á parte, unha estrutura de tal envergadura. «Xa había dúas instaladas e agora colocaron outras dúas, pero puxéronas onde máis molestan e onde máis perigo entrañan porque están moi pegadas ás casas», comenta Raúl Benito, un residente na urbanización. O seu temor, como o doutros veciños da rúa río Eume, é que «coa chegada de calquera temporal ou por calquera outro motivo a torre pódese vir abaixo e caer sobre nós», e aínda que confía en que a instalación se levantase con todas as garantías, advirte de que «parece que nunca hai problemas ata que pasa algo serio».
O medo dos residentes minimizaríase, sinalan, cambiándoas de emprazamento. «Poderíase ter buscado outra localización. Se as colocasen nas esquinas do campo non afectarían a ningunha das vivendas», asegura Raúl Benito. A indignación entre os residentes é aínda maior, xa que o Concello procedeu a instalalas a semana pasada «sen previo aviso e sen ter en conta noso parecer».
Os veciños dos Regos aseguran que non quedarán de brazos cruzados e que contactarán co consistorio a través da presidencia da comunidade para intentar que as quiten, ou polo menos, móvanas de sitio. Queremos que quede constancia do seu perigo potencial polo que poida pasar». Ademais, sinalan a dobre vara de medir do Concello, que lles impide plantar nas parcelas árbores de gran tamaño mentres que coa torre non hai ningún problema». Explican que vivir pegados a un campo de fútbol non supón ningún tipo de molestia de seu, pero lembran que para ter privacidade tiveron que pór pola súa conta «uns sebes» cando se construíu o recinto.
Este xornal intentou contactar co Concello de Oleiros para saber se contemplaban algunha actuación respecto diso, pero ao peche desta edición aínda non recibira ningunha resposta.