O alcalde asegura que o actual proxecto, con menos edificabilidade, axústase á realidade do municipio
27 ene 2021 . Actualizado ás 05:00 h.Costa Miño e monte Piñeiro son dous dos desenvolvementos urbanísticos planificados en Miño que máis polémica suscitaron por ir acompañados de sentenzas gravosas para as arcas municipais. Encarrilado o pagamento aos expropiados pola macrourbanización de Fadesa e finalizado o pagamento do canon cobrado no seu día polo proxecto en Piñeiro, o Concello anunciou onte que adxudicou, por 58.080 euros, a modificación puntual do PXOM para esa zona urbanizable.
Desde o goberno local lémbrase que se negociou coas empresas propietarias e conseguido a reducción de máis do 50 % das vivendas proxectadas para esa zona, que pasarán das 750 que se prevían no ano 2002 a 350. Así mesmo, avanza que nun prazo máximo de 20 meses terase lista esta modificación do Plan Xeral de Miño, que ademais de reducir as vivendas adaptará o documento ás novas normativas do Plan de Ordenación do Litoral (POL).
«Teremos unha previsión de edificación adaptada á realidade de Miño, ao sentido común e á situación actual polo que esta modificación pode considerarse como un mal menor que minimiza o impacto dunha situación herdada de anteriores xestións», indicou o alcalde de Miño, Manuel Vázquez Faraldo.