Os atacantes roubaron 700 euros do domicilio. A actuación da Policía Nacional foi crucial para evitar a morte da vítima
20 oct 2023 . Actualizado ás 13:31 h.Os autores do apuñalamento a un home que vai en cadeira de rodas no barrio das Flores da Coruña usaron unha catana e un puñal. Así o confirmou este venres a Policía Nacional despois de ter detido aos dous homes sospeitosos de ter cometido a agresión.
Os feitos sucederon sobre a unha da madrugada do pasado luns. O home atopábase vendo a televisión no seu domicilio, cando foi sorprendido por un forte ruído, unha pedra que desde o exterior fracturou unha fiestra.
Os supostos autores deste feito son dous homes, coñecidos da vítima, que accederon ao interior do domicilio rapidamente, ao tratarse dun piso baixo. Nese momento, segundo o relato policial, comezaron a agredilo, golpeándoo na cara e no corpo. Cunha catana e un puñal acoitelárono no antebrazo e na íngua.
Os atacantes querían diñeiro. Preguntáronlle onde estaba a cantidade que buscaban e, mentres un deles vixiábao, o outro rexistrou o domicilio. Cando localizaron 700 euros que a vítima tiña gardada no seu domicilio, abandonaron o lugar, deixándoo mal ferido e tendido no chan.
Foron algúns veciños os que chamaron ao 091 ao ter escoitado berros. Unha patrulla policial acudiu ao lugar e atopouse á vítima inconsciente no chan, nun charco de sangue. Os axentes da Brigada de Seguridade Cidadá, que chegaron en primeiro lugar, axeonlláronse no chan e presionaron a ferida profunda da íngua da vítima, á espera da chegada da asistencia médica.
Os médicos, con posterioridade, manifestaron que esta actuación policial lle salvou a vida á vítima, que non chegase vivo ao hospital xa que tería falecido dunha hemorraxia.
As investigacións posteriores foron realizadas pola Unidade de Delincuencia Especializada e Violenta, que conseguiu identificar aos dous autores, e deter a un deles o pasado martes, e ao segundo autor na tarde do xoves.
Ambos os detidos, de 44 anos e 42 anos, xa contaban con antecedentes policiais. Foron postos a disposición xudicial e decretouse o ingreso en prisión de ambos.