Ao redor de 4.400 persoas están convocadas para as probas PCR no polideportivo do Carregal
09 may 2021 . Actualizado ás 00:11 h.A área sanitaria da Coruña e Cee continúa na procura activa de casos ocultos de covid-19 e, dada a evolución dos últimos días de Betanzos, organiza para o luns e martes próximo un novo cribado poboacional. Nesta ocasión, as probas de detección diríxense especificamente aos veciños de entre 20 e 48 anos, unhas 4.400 persoas aproximadamente, que deberán achegarse ao pavillón polideportivo da avenida do Carregal para que se lles practique unha PCR.
Todas aquelas persoas pertencentes a esta franxa de idade serán citadas mediante mensaxe SMS nos seus teléfonos móbiles en horario de 09:00 a 14:00 e de 16:00 a 21:00 horas.
A convocatoria ten como obxectivo sacar á luz novos contagios, tendo en conta que na última semana a situación epidemiolóxica do municipio empeorou. Na actualidade, o concello de Betanzos atópase, en canto a taxa de incidencia acumulada a 14 días, no nivel alto, con entre 150 e 250 positivos por 100.000 habitantes. Ademais, nos últimos sete días a súa taxa de novos positivos sitúase entre 75 e 125.