Arteixo CCA reclama a reapertura do mercado semanal e estuda campañas conxuntas cos vendedores ambulantes
27 novs 2020 . Actualizado ás 12:10 h.As forzas vivas do comercio de Arteixo queren recuperar o tradicional feirón dos sábado. Tachan a súa suspensión de sinalan «agravio para o conxunto da economía local». «Toda a sociedade no seu conxunto e particularmente os profesionais do comercio estamos a realizar un gran esforzo para adaptar a nosa actividade aos protocolos de seguridade e garantir, deste modo, a saúde de todas as persoas implicadas: traballadores, clientes e provedores», nun comunicado os integrantes do Arteixo Centro Comercial Aberto, quen saíu en apoio dos vendedores ambulantes, que levan semanas sen poder acudir ao feirón do Concello. «Tanto os ambulantes como os propietarios de establecementos na vila entendemos que esta medida supuxo un agravio para a economía local. Noutros concellos da contorna, a pesar de ter as mesmas restricións ca nós, seguen celebrando as súas feiras semanais, xa que a Xunta permite o desenvolvemento da actividade. En boa lóxica, os vendedores que dende hai 28 anos montan o seu posto en Arteixo senten que están a recibir un trato discriminatorio e se ven que non poden traballar aquí, acabarán levando o mercado dos sábados a outro lugar. Ese é un luxo que o comercio local non se pode permitir», espetan.
A directiva de Arteixo CCA e os feirantes mantiveron unha reunión para avaliar a situación e ambas as partes coincidiron en retomar canto antes a celebración do popular mercado. «Estamos estudando a forma de poñer en marcha campañas conxuntas de dinamización comercial para atraer de novo aos consumidores aos nosos postos, tendas e establecementos de hostalería. Tamén pensamos que é preciso impulsar, desde as institucións, iniciativas como a distribución de bonos para favorecer as compras na vila, algo que xa se probou noutras localidades con bastante éxito, ou a peonalización temporal dalgunhas rúas. Estamos unidos en defensa do feirón do mesmo modo que estamos decididos a seguir ofrecendo plenas garantías sanitarias aos nosos clientes. Todos queremos un comercio seguro, sustentable e que sexa un motor económico para a vila», conclúen.