O pleno aprobou o cambio de denominación do barrio, dúas modificacións do orzamento e o novo regulamento das escolas infantís municipais
02 sep 2020 . Actualizado ás 21:38 h.O pleno do Concello da Coruña aprobou este xoves o cambio de denominación do parque Ofimático, que oficialmente pasa a chamarse Xuxán tal e como aprobara recentemente a Comisión de Honras e Distincións. Todas as formacións da corporación deron o seu apoio a esta modificación do nome 30 anos despois de que se elixise o título inicial.
O nome de Xuxán foi seleccionado despois de que así o recomendase a Real Academia Galega nun informe elaborado para o goberno local e que fai referencia á denominación tradicional desta zona da cidade.
Esta idea foi a que tamén se seguiu para dar o visto e prace a que algunhas rúas deste barrio reciban os nomes de Longarela, Galán, Agrelo, A Canteira, Campo de Galán e A Viña, xa que fan referencia a microtopónimos anteriores desta zona e así manter viva a súa memoria a través do rueiro.
A pesar do apoio unánime ás denominacións, os grupos da oposición fixeron referencia ás cuestións que están pendentes neste barrio, como son a urbanización ou unha resolución para os veciños de San Vicente de Elviña, que piden a desafectación.
Neste sentido, o concelleiro de Urbanismo , Juan Díaz Villoslada, comprometeuse a establecer desde setembro unha mesa para tratar os asuntos que se vaian abordando cos afectados, que este xoves presenciaron o pleno en directo en María Pita.
Na sesión tamén se votaron dous cambios no orzamento, un deles de 443.039 euros para afrontar gastos de desinfección derivados do virus e o outro para unificar dúas partidas coa Academia Galega do Audiovisual e promover un horto urbano no parque Adolfo Suárez.
O primeiro deles foi aprobado cos apoios do goberno local e a Marea despois de que ambos acordasen unha emenda que inclúe partidas para diversas entidades culturais e deportivas da cidade e que fora proposta polo grupo da oposición. Mentres, o Partido Popular, o BNG e o Grupo Mixto abstivéronse.
Durante a discusión deste punto houbo críticas á execución orzamentaria e aos pagamentos de facturas pendentes á Compaña de Tranvías por valor de 1,5 millóns de euros, punto no que o PP e a Marea optaron pola abstención.
O último asunto foi a aprobación definitiva do novo regulamento das escolas infantís municipais, que a partir do próximo curso serán gratuítas, ademais doutras modificacións. Neste punto o goberno local volveu contar co apoio da Marea, mentres que o resto das formacións decantáronse pola abstención.
No debate houbo críticas polo rexeitamento das alegacións do Partido Popular, BNG e das directoras dos centros. Ademais, o portavoz municipal, José Manuel Lage Tuñas, afirmou que «se trata de chegar a un acordo e cumprilo» ante as alusións a que o texto non contentaba aos grupos.
Fin de curso político
Máis aló dos propios asuntos que figuraban na orde do día, a sesión extraordinaria supuxo o punto e final ao exercicio político ante o inminente inicio de agosto.
O goberno local conseguiu sacar adiante todos os puntos da orde sen ningún voto en contra a pesar de que recibiu críticas en case todos os asuntos e por parte de todas as formacións. As máis duras foron por parte do PP, que lamentou que a negociación dos cambios nas contas non fosen máis abertas para presentar as súas propostas. Os populares lembraron que o Presco non está en marcha e criticaron aspectos como os datos de execución orzamentaria ou os servizos sen contratos.
Mentres, o acordo previo ao pleno do goberno local coa Marea permitiulle sacar adiante o asunto que presentaba máis dificultades, un modificativo para afrontar gastos de desinfección. O grupo da oposición presentara emendas e o PSOE pactou unha para asegurarse o apoio, que estivo acompañado por un cambio de actitude dos edís da Marea con respecto aos seus últimos ataques aos reitores de María Pita. O acordo espertou as críticas do BNG, que máis aló do fondo da cuestión ou das partidas que pactaron ambas as formacións, afeou a forma de funcionar do goberno local.