Atasco nas praias da Coruña: «No Matadoiro vanse tirando uns amais de outros»
A Coruña CIDADE
Chamada á responsabilidade para non superar as capacidades e respectar as indicacións dos semáforos nos areais
07 jul 2020 . Actualizado ás 18:49 h.A partir das 4 da tarde deste martes, os dous semáforos instalados nos accesos á praia do Matadoiro na Coruña xa estaban en vermello. «Nós estabamos desde as 12 e aínda non había problemas», conta Iván Rodríguez, que veu coa súa familia, «pero agora segue chegando xente aínda que os semáforos estean en vermello e así non se respecta o distanciamento social». Este veciño fai un chamamento á responsabilidade: «O que non pode ser é que vaia subindo a marea e chegue máis e máis xente. Vanse tirando uns amais de outros».
Algúns dos veciños que chegan ou se marchan da praia ao redor das cinco da tarde non se explican por que non se vixía máis a capacidade da praia. «Falla moito o control», sentenza Milucho, un habitual desta praia. No acceso atópase con Maite, outra das que leva vindo «toda a vida». Ela di:
- Xa está en vermello. Vai tocar agardar. Miúdo rolo temos este ano.
El contesta: «Vou agardar un pouco aquí a ver se cambia e ponse en verde. Mentres tanto, non pasa nada por tomar o sol nun dos bancos». Pero a calor pode con eles. E como ven que hai xente que sae e o semáforo non cambia de cor, entran os dous á praia.
Algo parecido ocórrelle a Marián. «Estiven facendo cola media hora, pero saía xente polos dous accesos e o semáforo non se movía. Vin entrar a xente, así que entrei eu tamén», conta.
Con todo, hai outras persoas, como Maite, que decidiron probar sorte en Orzán ao ver o semáforo da praia do Matadoiro en vermello. «Se está en vermello, non se pode pasar. Xa está. Se non hai oco no Orzán tampouco, agardarei a que baixe a marea e, se non cambia, para casa», explica.
OUTRAS QUEIXAS
Desde os servizos da orde nas praias piden que se consulte a aplicación ou a páxina web das praias antes de baixar para non acudir a as que xa están completas. Como a do Matadoiro adoita estar máis chea, piden que a xente vaia a Orzán ou Riazor para evitar aglomeracións, sobre todo cando a primeira xa está chea.
Isto non gusta demasiado a algún dos habituais da praia. David, que di levar vindo «máis de 40 anos» pide que «poñan un carné ou algo» para privilexiar o acceso a aqueles que levan «vindo toda a vida».
Ademais, David quéixase porque ten «un amigo minusválido que xa non pode vir á praia porque puxeron uns valos na rampla». Iván incide tamén nese problema: «Que fan agora os minusválidos ou os que veñen con carriños de bebés? Tíranse polas escaleiras?».